Саха Сиригэр биллэр ааттаах-суоллаах “ЧОРООН XXI үйэ” тэрилтэ маастардара Амма 1№-дээх оскуолатын выпускниктарыгар керамикаҕа уруһуйдааһыҥҥа маастар-кылаас ыыттылар.
Биир дойдулаахпыт Софья Трофимовна Попова салайар тэрилтэтэ саха иһитин, өбүгэ үгэстэрин тарҕатыыга киэҥ хабааннаах үлэни ыытар. Олоҥхо ыһыаҕар бэлэмнэнии чэрчитинэн Амма улууһугар тахсан үлэлиир кэмнэригэр тэрилтэ үлэһиттэрэ биһиги оскуолабытыгар кэлэннэр сиэр-майгы тематыгар, саха буолар кэрэтин туһунан аһаҕас кэпсэтиини ыыттылар, Е.Ярославскай аатынан түмэл үлэһитэ сэдэх хаартыскалары көрдөрдө, история чахчыларын сэгэттэ уонна маастардар 11 кылаас үөрэнээччилэригэр олус интэриэһинэй үөрэх ыыттылар.
Керамикаҕа уруһуйдааһыны оҕолорбут олох умсугуйан туран ылыннылар. Маастардар олус хайҕаатылар, оҕолортон астыннылар. Аан бастакытын үлэлиир оҕолор диэтэххэ бэркэ оҥордулар диэтилэр. Аны оҕолорбут уруһуйдарын ис хоһоонноро уонна дууһаларын ууран туран оҥорбуттара эмиэ сөхтөрөр.
Туяра Никифорова.