Тыынар-тыыннаах харыстабылын күнэ Арассыыйаҕа 2000 сылтан бэлиэтэнэр. Бу күн элбэх кыыл айылҕа эмсэҕэлээһинигэр, алдьаныытыгар оҕустаран эстэн эрэрин иһин олохтоммута. Экологическай хайысхалаах Үлэ Геройа П.И.Яковлев аатынан Амма Наахара орто оскуолатыгар бу күнү сэргэх тэрээһиннээх бэлиэтээтилэр.
Сарсыардаттан оскуолаҕа «Я и мой питомец» диэн хаартыскалар быыстапкалара турда. Алын сүһүөх үөрэнээччилэригэр төрөппүт, ветеринар — фельдшер идэлээх Алексей Илларионов кэлэн аһаҕас кэпсэтии ыытта.
«Киһи олоҕор дьиэ кыыллара улахан оруолу оонньууллар. Кинилэр дьиэ ис эйгэтин ыраастыыллар, тупсараллар, киэргэтэллэр, сорох кыыллар дьону эмтиир күүстээхтэр. Биһиги олохпутун кинилэр интэриэһинэй оҥороллор. Бүгүн эһиги сөбүлүүр дьиэҕит кыылын — ыт туһунан кэпсиэҕим. Ыттар хас да көрүҥҥэ арахсаллар: дьиэ харабыла, дьон олоҕун быыһааччылар — Уонна кыракый киэргэл ыттар диэн эмиэ бааллар. Биһиэхэ нэһилиэкпитигэр булчут лайка ыттар уонна дьиэ харабыллара элбэхтэр. Булчут ыттарга лайка, лабрадор, шотландская колли боруодалар, харабыл ыттарга сенбернар, ротвелер, овчарка, бульдог ыттар, декоративнай боруодаҕа — киэргэл ыттарга шпиц, пудель, чихупхуа, мопс киирэллэр. Ыттары хаһаайыннара үчүгэйдик көрүөхтээхтэр. Ыт ытырар буоллаҕына намордник кэтэрэ ордук. Билиҥҥи сокуонунан ыттар сыапка бааллан туруохтаахтар. Ыттарбыт уһуннук, ыалдьыбакка олоруохтарын баҕарар буоллахпытына кинилэри ветеринарнай кииҥҥэ регистрациялатан, паспорт ылаллар. Ол кэннэ сылга биирдэ вакцинация ылыахтаахтар. Билбэт ыккын, куоскаҕын хаһан да имэрийимэн. Тоҕо диэтэр кинини эн ииппэтэҕин, майгытын билбэккин. Билиҥҥи кэмҥэ чип туруоруута элбээтэ, тоҕо диэтэххэ чип көмөтүнэн ыт вакцина ылбыта, ханна сылдьара ситимҥэ көстө олорор. Дьиэбит кыылларын үчүгэйдик аһатыахтаахпыт, күүлэйдэтиэхтээхпит» — диир эдэр исписэлиис Алексей Алексеевич диэн оҕолорго быһаарар.
Бэйэни салайыныы үөрэнээччилэрэ улахан кылаастар бу күн алын сүһүөхтэргэ переменаҕа «Гора самоцветы», «Волчонок» мультиктары көрдөрдүлэр. Эбиэт кэннэ дириэктэр сүбэһитэ, үөрэх чааһыгар дириэктэри солбуйааччы Наталья Устинова, иитии чааһыгар дириэктэр солбуйааччыта Матрёна Романова, оҕолору түмэр-салайар оҕо тэрилтэлэрин салайааччыта Акулина Устинова «Белый бим черное ухо» киинэни көрдөрдүлэр. Дьикти күнү тэрийбит учууталларга, бу күҥҥэ кыттыыны ылбыт үөрэнээччилэргэ барҕа махтал тыллары аныыбыт. Эрэллээх доҕотторгутун таптаан, харыстаан, көрөн-истэн иитин! Прививка бэрдэрэн араас ыарыылартан харыстаан!
Ирина КОРЯКИНА-ОЛЕСОВА