Оҕолору байыаннай-патриотическай оонньуу сомоҕолоото

Бэҕэһээ Амма Наахара орто оскуолатын барыга көхтөөх иккис кылааһын үөрэнээччилэрэ Даниэль Никитин — хамандыыр, Тунаара Кузьмина, Айтал Макаров, Филипп Пахомов, Айсаана уонна Айаана Александровалар улуустааҕы «Зарница» күрэҕэр кытыннылар.

Ол туһунан күрэххэ үөрэнээччилэрин салайан илдьэ сылдьыбыт кылаас салайааччыта Айталина Филиппова маннык сэһэргиир:

-Саҥа үлэҕэ киирбит Абаҕа оскуолатыгар бастакытын ыытыллыбыт «Зарница 2.0» күрэххэ уопсайа 14 хамаанда кытынна: Амма №1 оскуолатыттан икки хамаанда, Амма №2 оскуолатыттан икки хамаанда, Лицейтэн икки хамаанда , Абаҕа, Амма-Наахара, Бөтүҥ, Болугур, Сатаҕай, Соморсун, Покровка, Чапчылҕан оскуолалара кытыннылар. Хамаандалар биэс түһүмэххэ күрэхтэстибит.

 

Бастакы түһүмэххэ строевой хаамыы, иккискэ «Бастакы суһал көмө «, үһүскэ билиини тургутуу, төрдүскэ «Зарничка» мэһэйдэри туорааһын, бэһискэ «Снайпер» сыал табыыта диэн түһүмэхтэргэ күөн көрүстүлэр.

Уопсай түмүккэ биһиги хамаанда 7-с миэстэ буоллубут. Бастакы миэстэ Лицей 2 хамаандата, иккис миэстэ АСОШ №1 иккис хамаандата, үһүс миэстэ Покровка, төрдүс миэстэ АСОШ №1 бастакы хамаандата, бэһис миэстэ Лицей бастакы хамаандата, алтыс миэстэ Абаҕа орто оскуолалара буоллулар. Оҕолорум үөрэ-көтө күрэхтэстилэр, оҕолору кытары билсэн астыннылар аҕай. Абаҕа сана оскуолатын көрдөн үөрдүлэр. Күрэххэ кыттарга тэҥҥэ оҕолорбун бэлэмнэспит бииргэ үлэлиир учууталларбар Иван Прокопьевичка, Наталья Дмитриевнаҕа, практикатын ааһа сылдьар уолбутугар Уйусхан Пахомовка уонна төрөппүттэрбитигэр махтанабын. Оҕолорум ситиһиилэрэ, саҥаҕа билиилэрэ инникитин өссө күүс-көмө буолуоҕа.

 

100 тахса килимиэтэри айаннаан тиийэн күрэххэ кыттыбыт иккис кылаас үөрэнээччилэригэр үчүгэй үөрэҕи, барыга өссө үрдүк ситиһиини баҕарыаҕыҥ.

Ирина Кояркина — Олесова.

Читайте дальше