Амма улууһун үөрэҕин үлэһиттэрин балаҕан ыйдааҕы сүбэ мунньахтарын чэрчитинэн оҕону иитиигэ туһуламмыт бэрт сэргэх кэпсэтии улуус дьаһалтатын аактабай саалатыгар буолан ааста. Кэпсэтиигэ оскуола дириэктэрдэрэ, уопсастыбанньыктар, төрөппүттэр кэмитиэттэрэ, нэһилиэк баһылыктарын солбуйааччылара кыттыыны ыллылар.
“Иитии – сайдыы тосхоло” диэн ыытыллыбыт “төгүрүк остуолу” Амма улууһун баһылыгын социальнай боппуруостарга солбуйааччыта Ньургуйаана Илларионова салайан ыытта. Кэпсэтии куйаар нөҥүө эмиэ ыытыллан нэһилиэктэр кыттыыны ыллылар. Бу кэпсэтиигэ кыттыыны чааһынай оскуоланы, уһуйааны тэрийэн үлэлэтэр Анатолий Бурнашев гендернэй иитии уратыларын, “Алаас” түөлбэ салайааччыта, уопсастыбанньык Петр Табунанов төрөппүт кэмитиэтин үлэтин, уопсастыбанньык Спартак Трофимов оҕолор ийэ тылы билиилэригэр, Эмис нэһилиэгиттэн Николай Уваров уол оҕону иитии уратыларыгар, маныаха “Атынан айан” бырайыак үлэтин, Амма 1№-дээх оскуолатын ОБЖ предметин учуутала, “Эрэл” байыаннай-патриотическай кулууп салайааччыта Дмитрий Петухов оҕону патриотическай өйгө-санааҕа иитии туһунан иһитиннэриилэри оҥордулар.
Кэпсэтиигэ Эмистэн оскуола дириэктэрэ Гаврил Захаров, Амматааҕы лиссиэй дириэктэрэ Дария Захарова, Амматааҕы Н.С. Захаров аатынан оҕо спортивнай оскуолатын дириэктэрин солбуйааччы Виктория Владимирова уо.д.а. кыттыыны ыллылар. Кэпсэтии саҕаланыан иннинэ “Бастакылар хамсааһыннара” диэн уопсастыбаннай хамсааһын Амматааҕы салаата кыттааччыларга уйулҕаҕа, дьиэ кэргэҥҥэ сыһыаннаах оонньууну ыытта. Бүгүҥҥү кэпсэтиигэ улуус саамай көхтөөхтүк үлэлиир төрөппүт кэмитиэтин Петр Табунанов салайааччылаах Амма 1№-дээх оскуолатын кэмитиэтэ буолла уонна Өлүөнэ очуостарыгар сынньана барар путевкаҕа сертификат тутта.
“Оҕону, биһиги кэнчээри ыччаттарбытын иитиигэ туһуламмыт олус интэриэһинэй, сэргэх кэпсэтии буолла. Чахчы да оҕолорбутун хайдах иитэн таһаарарбыт дьиэ кэргэнтэн улахан тутулуктаах. Манна бэйэм улахан уолум үөрэнэр кылааһыгар хайдах үлэлиирбит туһунан сырдаттым. Холобур быһыытынан курдук. Уопсайынан бүгүн буолбут бары кэпсэтии тиэмэлэрэ олус суолталаахтар. Ыҥырыылаах ыалдьыт Анатолий Аркадьевич Бурнашов иһитиннэриитин истэн баран, олус сэргээтим. Урут да истэр этим кини оскуолатын туһунан. Онно боростуойдук уол кыыс диэн арааран, уу сахалыы иитэр диэн өйдүүр этим. Онтум олох киэҥ, атын эбит. Кэпсэтии түмүгэр 2023 сыллаах улуус оскуолаларын төрөппүттэрин кэмитиэтин үлэлэрин көрүү күрэҕин түмүгүнэн биһиги кэмитиэппит бастаан Ил Түмэн депутата Сергей Александрович Ларионов Өлүөнэ очуостарыгар сертификат туттаран олус үөрдүбүт. Ону бу күннэргэ быһааран икки кэмитиэппит чилиэнэ балаҕан ыйыгар сынньана барыахтара. Өссө саас бүтэһик чуорааҥҥа кэмитиэппитигэр улуус үөрэҕин управлениета 10000 солкуобай биэрбитэ», — диэн Петр Валерьевич санаатын үллэһиннэ.
Сиһилии “төгүрүк остуол” туһунан хаһыаппытыгар сырдатыахпыт.
“Амма олоҕо” хаһыат