Бүгүн улуустааҕы үөрэх управлениетын дьиэтигэр доруобуйаларынан хааччахтаах оҕолорго уйулҕа, педагогика өртүнэн уонна медика-социальнай көмөнү оҥорор киин арылынна. Үөрэх эйгэтигэр бэлиэ тэрээһин сахалыы алгыстан саҕаланна.
Амма улууһун үөрэҕин управлениетын аттыгар саха дьонун сиэринэн саҥа тэрилтэ айымньылаахтык, көдьүүстээхтик үлэлиирин алҕаан аал уот оттуллунна, алгыс этилиннэ. Тэрээһиҥҥэ кэлбиттэр оттуллубут аал уоттан арчылланнылар. Дьэ бу кэнниттэн киин арыллыбытын бэлиэтиир аалай лиэнтэни быстылар. Бэйэлэрин эҕэрдэ тылларын улуус дьокутааттарыни Сэбиэтин бэрэссэдээтэлэ Владимир Колосов, улуус баһылыгын социальнай боппуруостарга солбуйааччы Ньургуйаана Илларионова, улуус үөрэҕин салаатын начальнигын э.т. Татьяна Иванова, улуус оскуолаларын дириэктэрдэрин аатыттан Филипп Лобанов аатынан Чапчылҕан орто оскуолатын дириэктэрэ Оксана Емельянова, улуус уһуйааннарын сэбиэдиссэйдэрин аатыттан “Хатыҥчаана” ОСК сэбиэдиссэйэ Саргылана Петрова, үөрэх үлэһиттэрин идэлээх сойуустарын бэрэссэдээтэлэ Прокопий Бытыров, улуустааҕы психологическай киин салайааччыта Аина Неустроева, территориальнай медикo-психологическай хамыыһыйа бэрэссэдээтэлэ Лидия Максимова тириэртилэр, бэлэхтэрин туттардылар уонна олус наадалаах киин аһыллыбытын, бу бэлиэ күнү күүппүттэрин, кэлэр кэнчээри оҕолорбут доруобай, чэгиэн үөрэхтээх буолалларыгар баҕа санааларын тириэртилэр. Улуус салалтата Киин сайдыытыгар 250000 солкуобайдаах сэртипикээти, идэлээх сойуустар канцелярскай табаардары атыылаһалларыгар 10000 солкуобайдаах сэртипикээти, онтон үөрэх салаата үлэҕэ туттарга ноутбук бэлэхтээн, киин үлэһиттэрэ үөрүүлэрэ үксээтэ.
“Биһиги кииммит быйыл Арассыыйаҕа Дьиэ кэргэн, Саха сиригэр Оҕо саас сылыгар аһыллыбыта ураты бэлиэ буолар. Бу киин аһар туһунан улуус баһылыгын дьаһала өссө 2022 сыллаахха тахсыбыта эрээри, араас мэһэйдэр баар буоланнар кыайан арыллыбакка турбута. Дьэ онтон бу улуус үөрэҕин салаата үлэлэлэһэн, управление дьиэтигэр үлэлииргэ усулуобуйалаах хостору биэрэннэр Кииммит арылынна. Манна барыта түөрт үлэһит буолабыт. Миигин кытта өссө психологунан уопуттаах, үлэтинэн өрөспүүбүлүкэҕэ биллэр Светлана Цветкова, логопед-учууталынан Матрена Михайловна Уварова уонна дефектолог-учуутал Любовь Борисова үлэлиэхтэрэ.
Билэргит курдук сыллата мөлтөхтүк саҥарар, сайдыыларыгар бытаан оҕолорбут ахсааннара элбээн иһэрэ дьиксиннэрэр. Биһиги улууспутугар күн бүгүн 110 инбэлиит уонна 240 доруобуйаларынан хааччахтаах оҕолор бааллар. Ааспыт сылы кытта тэҥнээтэххэ быйыл инбэлиит оҕобут 14 оҕонон элбээбит, онтон доруобуйаларынан хааччахтаах оҕобут ахсаана кыранан да буоллар кыччаабыт. Кинилэргэ миэстэтигэр көмөлөһөргө оскуолаларга уонна уһуйааннарга анал үөрэхтээх исписэлиистэр үлэлииллэр. Ол курдук оскуолаларга 18 педагог-психолог, 18 социальнай-педагог, 4 логопед, 4 тьютор үлэлиир. Онтон уһуйааннарга 15 педагог-психолог, 15 логопед уонна 1 дефектолог баар. Бу күнтэн ыла биһиги хас биирдии уһуйааны, оскуоланы ыкса сибээстээхтик үлэлиэхпит”, — диэн киин салайааччыта, тэрийэр да, иитэр да үлэҕэ улахан уопуттаах Марина Тарабукина сырдатта.
Түмүккэ киин үлэһиттэрэ ыалдьыттарын баҕа санаалаах минньигэс кэмпиэттэринэн күндүлээтилэр.
“Амма олоҕо” хаһыат