Амма Наахара нэһилиэгин Андрей Анастасьевич Захаров салайааччылаах ОДьКХ туруу үлэһиттэрэ Аҕа саастаахтарга аналлаах декадаҕа сыллата кытталлар. Үгэскэ кубулуйбут бэлиэ күҥҥэ быйыл бэтэрээннэригэр Ефремов Анатолий Николаевичка, Бадмаев Лопсон-сырен Домбаевичка, Ксенофонтов Михаил Афанасьевичка, Пахомов Алексей Дмитриевичка, Пахомов Павел Александровичка илии тутуурдаах, өттүк харалаах ыалдьыттаатылар.
Ону истэн олохтоохтор нэһилиэк сонуннарын ыытар ситим нөҥүө истиҥ эйэҕэс тылларын анаатылар. «Эһэбитигэр, Үлэ ветераныгар Михаил Афанасьевичка ОДьКХ начальнига Захаров Андрей Анастасович кочегар уолаттарынаан Аҕа саастаахтар күннэринэн кэһиилэрин хаас, икки кус, аджика бэлэх туттардылар. Улахан махтал,эһэбит наһаа үөрдэ», «Үтүө-мааны, иһирэх санаалаах истиҥ дьоммутугар ис сүрэхтэн тахсар сылаас эйэҕэс сахалыы барҕа махтал тылларын ыытабыт. Саастаах дьоҥҥо үтүө сыһыаҥҥытыгар, амарах санааҕытыгар, үтүө быһыыгытыгар барҕа махтал буоллун! Бу үтүөҕүт эһиэхэ сүүс төгүл үтүөнэн эргилиннин, дьиэ кэргэҥҥит чэгиэн доруобуйалаах, ситиһиилээх, дьоллоох буоллун. Суолгут сырдык, санааҕыт бигэ буоллун. Кэлэр кэскил ыччаккыт тирэхтээх үтүө дьон буоллуннар. Махталларын!», «ОДьКХ үлэһит уолаттарыгар барҕа махтал! Дьиэ кэргэҥҥитигэр дьолу, иллээх-эйэлээх олоҕу, элбэх үөрүүнү, үлэҕитигэр ситиһиини, кытаанах доруобуйаны баҕарабыт!», «Андрей Анастасьевич кырдьаҕастарын убаастаан, үчүгэй дьыала оҥорбута кырдьаҕас дьону үөрдэр. Уолаттар маладьыастар, инникитин даҕаны үөрдэ-көтүтэ сылдьыҥ». Мантан да элбэх ис сүрэхтэн тахсар үтүө тыллар саҥа хаар кыырпаҕыныы ситим нөҥүө тэлээрэ көттүлэр.
Кыһыҥҥы тымныылары кытары охсуһар үлэһит уолаттарбытыгар Байанайгыт маанылыы, үтүө санааҕыт үтүөнэн сыдьаайа туруохтун диэн үөрэн туран баҕа санаабытын ыытабыт.
Ирина Корякина – Олесова.