Амма улууһун тыа хаһаайыстыбатын управлениета хомуйар субуоккатынан, атырдьах ыйын 1 күнүн туругунан улуус үрдүнэн от былаана 19 эрэ бырыһыан туолла. От үчүгэйдик үүммэтэҕэ, кэнники ардахтар оттооһуҥҥа харгыстары үөскэтэллэр. Ааспыт сыл бу кэмигэр былаан 37 бырыһыан туолбута. Күн бүгүн улууска оттооһуҥҥа ыксаллаах быһыы- майгы балаһыанньата биллэриллэн турар.
Атырдьах ыйын 1 күнүгэр улуус үрдүнэн окко 2000-ча кэриҥэ киһи, 800-тан тахса техника үлэлии сылдьар. Кинилэр күүстэринэн 5534, 5 тонна от кэбиһиллэн былаан 19,1 бырыһыан туолан иһэр. Хаһаайыстыбалар 984 тонна оттононон былаан 12,9, бааһынай хаһаайыстыбалар 2145,5 тоннаны кэбиһэн 19,4 уонна чааһынайдар 2409 тонна оту туруоран былааннарын 23,6 бырыһыан толордулар. Бу ааспыт сылы кытта тэҥнээтэххэ быстар мөлтөх. Быйыл сайын курааннаан хочо сирдэр үүммэккэлэр от былаанын толорууга күчүмэҕэйдэр элбэхтэр. Улуус салалтата былырыыҥҥы хаалбыт оту кытта уонна эбии аһылыгын эбэн былааны 70-тан тахса бырыһыан толорор соруктаах.
“Амма олоҕо” хаһыат