Болугур нэһилиэгэр тустууну сэҥээрээччилэргэ эрэ буолбакка, бары олохтоохторго долгутуулаах түгэн буолан ааста. Болугурдар бэйэлэрин уолларын, сайын Париж куоракка ыытыллыбыт Олимпиада кыттыылааҕа Георгий Окороковы уруйдаатылар-айхаллаатылар.
Георгий Окороков Олимпиадаҕа кыттар путевканы ылыытын аммалар уонна дойдутун эрэ дьоно буолбакка, бүтүн Саха сирэ барыта өрө көтөҕүллэн туран көрсүбүтэ. Чахчы да хайа баҕарар спортсмен киһи баҕарар баҕата Олимп чыпчаалыгар кыттыы буолар буоллаҕа. Георгий бу путевкатын Египеткэ ыытыллыбыт сүүмэрдиир күрэхтэһиигэ ситиһиилээхтик кыттан ылбыта. Онно уолбут ыраас, чаҕылхай киирсиилэри көрдөрбүтэ.
Георгийы дойдутугар улаханнык убаастаан, кини бу Олимпиадаҕа кыттан дойдутун, Болугурун ааттаппытын өрө тутан астынан туран чиэстээтилэр. Бэйэлэрин эҕэрдэ тылларын улуус дьокутааттарын Сэбиэтин бэрэссэдээтэлэ, биир дойдулааҕа Владимир Колосов, нэһилиэк баһылыга Андрей Петров, улуус спордун управлениетын сүрүн исписэлииһэ Кирилл Захаров, спорт бэтэрээннэрэ Ньургун Гольдеров, Галина Максимова, Георгий аймахтара, бииргэ үөрэммит доҕотторо истиҥник тириэртилэр. Биир дойдулаахтара талааннаах спортсмен уолларыгар убаһа, харчынан бэлэх оҥордулар.
“Биһиги уолбут спорт саамай муҥутуур улахан күрэхтэһиитигэр баран кыттыыны ылбыта бу үрдүк ситиһии, көрдөрүү буолар. Георгий манна 16 аан дойду ааттаахтарын кытта күөн көрүстэ, бэйэтин холонно. Уопсайа Амма улууһуттан төрүттээх үс уолбут кыттыыта улуус спортка үлэтин биир көрдөрүүтэ буолар. Кинилэр бары дьаныардаах үлэ түмүгүнэн Олимпиадаҕа тиийдилэр диэн бэлиэтиибин. Георгий билигин эдэр, онон инникитин өссө да баран кыттан хайаан да мэтээллээх кэлэригэр бука бары баҕардыбыт. Болугур нэһилиэгин олохтоохторо Любовь Георгиевна уонна Трофим Трофимович Окороковтар оҕолоро бары да спортсменнар. Ол курдук кыыстара Анюта Европа мас тардыһыыга чемпиона буолар. Уоллара Георгий кыра эрдэҕиттэн спортка сыстан улааппыта. Бу төрөппүттэр оҕолорун иитиилэригэр ураты болҕомтону ууралларын көрдөрөр. Онон кинилэргэ эмиэ ис сүрэхтэн махталбытын этэбит ”, — диэн Владимир Колосов санаатын тириэрдэр.
“Амма олоҕо” хаһыат