Комсомол төрүттэммитэ 106 сылыгар анаммыт сылын аайы ыытыллар “Үһүс көлүөнэ оскуола” аһаҕас күрэх-бэстибээлин тэрээһинэ үрдүк таһымнаахтык ааста. Саастаах дьон үөлээннээхтэрбитин көрсөн, истиҥник сэһэргэһэн, үөрэн-көтөн улахан дуоһуйууну ыллыбыт.
Урут, “Амма” сопхуос эрдэххэ, Чакыр спортсаалатыгар хоно сытан элбэх да көрүҥҥэ күрэхтэһэрбит. Умнуллубат түгэннэри Чакыртан Александра Кириллинаны кытары истиҥник-иһирэхтик аҕынныбыт. Эдэр, тэтиэнэх эрдэххэ күрэхтэһэр олус да үчүгэй буолара, бырааһынньык курдук саныырбыт. Чакыр олохтоохторо биһиэхэ наһаа “ыалдьаллара”, өр күрэхтэспит буоламмыт үчүгэй өйдөбүлү хааллардахпыт. Ыалдьытымсах да ыаллардаах этэ, ол курдук, бүтүн хамаанданы, сүүрбэттэн тахса киһини дьиэлэригэр ыҥыран аһаталлара, күндүлүүллэрэ. Кириллин Кешалаахха, Новиков Михаиллаахха, Николаев Иннокентийдаахха, Иванов Семеннаахха ыалдьыттаабыппытын олус астынабын.
Өссө биир сэдэх түгэни Герой-ийэ Евдокия Сергееваны көрсөн аҕынныбыт. Кини сайылыгар “Саха дьахтара – алаас хотуна” хамсааһын буолбутугар мин сүүрүүгэ кыттыбытым. Арай диктор биллэрдэ: “Бүгүҥҥү тэрээһиҥҥэ саха үс мааны Далбар Хотуттара аан бастакытын бииргэ түмүстүлэр. Ол – САССР Үрдүкү Сэбиэтин бэрэссэдээтэллэрэ Овчинникова Александра Яковлевна, Горохова Евдокия Николаевна уонна Григорьева Люлия Николаевна ыалдьыттыы сылдьаллар”. Мин биир дойдулааҕым бииргэ үөрэммит үөлээннээҕим, оту-маһы хомуйуунан дьарыктанар Мария Евсеевна Петрова саҕалааһынынан кириһиэнньэ уутун ыларбыт. Ол уубун улахан бөтүөнүнэн кэргэним Петр Семенович суоппар буолан илдьибитим. Горохова Евдокия Николаевна сиэни сиэтэн биһиги түөлбэҕэ кэлэ сылдьыбыта. Сиэнэ бааһырарын эппитигэр мин кириһиэнньэ уутун бытыылкаҕа кутан илдьэн биэрэр киһи буоллум. Түөлбэнэн аһыы олороллоругар түбэстим, миигин ыҥыран ылан музыкальнай нүөмэр биэрэрбин көрдөспүттэригэр Күннүк Уурастыырап “Алаастарбытыгар төннүөҕүҥ” хоһоонун аахтым. Мин оннук улахан түһүлэгэҕэ үс саха мааны Далбар Хотуттарын кытта түбэспит дьоллоох түгэннээхпин, ону дьылҕм бэлэҕинэн ааҕабын.
Быйылгы күрэххэ эмиэ ити хоһооммунан 1 истиэпэннээх Лауреат буоламмын өйдөбүнньүк статуэтка тутар дьоллоннум. Салайааччым Евдокия Васильевна Платонова кырыымпаҕа доҕуһуоллаан киниэхэ махталым улахан. Дьиэ кэргэнигэр бары үтүөнү баҕаран туран доруобуйа доргуйбатын, ситиһии сиэттистин, кыайыы килбэйдин диэн баҕа санаабын тиэрдэбин.
Елена Никифорова.