Амма Наахара нэһилиэгин олохтоох бибилэтиэкэтэ үлэтэ киэҥ хабааннаах. Бибилэтиэкэ Олоҥхо дэкээдэтин чэрчитинэн бэйэтин ааҕааччыларыгар дьыктаан уонна викторина ыытта.
“Сэтинньи 25 күнүгэр өрөспүүбүлүкэбитигэр Олоҥхо күнэ бэлиэтэммитэ. Онтон улууспутугар Олоҥхо дэкээдэтэ сэтинньи 22 күнүгэр үөрүүлээхтик аһыллан, билигин араас таһымнаах тэрээһиннэр ыытылла тураллар. Биһиги бибилэтиэкэбитигэр «Олоҥхо эйгэтэ» кинигэ быыстапкатын тэрийдибит, гугл форматынан «Олоҥхо дойдутугар айан» викторина оонньоттобут уонна дьыктаан ыытылынна. Быйылгы дьыктаан Былатыан Ойуунускай «Дьурулуйар Ньургун Боотур» олоҥхоттон быһан тардан икки тылынан ыытылынна. Дьыктаан суруйа кэлбит ааҕааччыларбыт саха уус-уран айымньытын сахалыы тиэкиһин талан суруйдулар. Олоҥхо тыла-өһө, таба суруйуута уустугун бэлиэтээтилэр. Дьыктаан түмүгүнэн Александра Пахомова, Лариса Унарова, Туйаара Романова, Екатерина Михайлова дьыктааны туйгуннук суруйдулар, үлэлэриттэн дуоһуйдулар. Бары кыттааччыларбытыгар «Туоһу сурук» туттардыбыт», — диэн сүрүн бибилэтиэкэр Екатерина Унарова сырдатта.
Ирина КОРЯКИНА-ОЛЕСОВА