Кэнники кэмҥэ араас бырагыраамалар үлэҕэ киирэннэр нэһилиэк сайдыытыгар, инники олоҕор-дьаһаҕар улахан көмө буолаллар. Онтон биирдэстэринэн олохтоох көҕүлээһини өйүүр бырагыраама буолар. Амма Наахара нэһилиэгэр олохтоохтор бу бырагыраамаҕа көхтөөхтүк кытталлар.
Захар Александров аҕа баһылыктаах Амма Наахара нэһилиэгэр олохтоох бэйэни көҕүлээһин бырагырааматыгар кыттар бырайыактары талыы сэҥээриини ылар. Ааһан эрэр 2023 сылга нэһилиэк иһинэн дьон баҕа санаатын үөрэтэр ыйытык ситим нөҥүө көдьүүстээхтик барбыта. Ыйытык түмүгүнэн нэһилиэк иһинээҕи суолу оҥоруу, уулусса уота итиэннэ Ийэ скверин оҥоруу инники күөҥҥэ тахсыбыттара. Хас биирдии нэһилиэк олохтооҕун куолаһын ааҕан, этиммит санааларын истэн ханнык бырайыак олоххо киирэрэ быһаарыллыытыгар олохтоохтор уопсай мунньахтарыгар санааны истии буолла. Дьэ ол түмүгэр былырыын улууска миэстэлэспит Үлэ дьоруойа П.И. Яковлев аатынан Амма Наахара орто оскуолатын 11-с кылааһын бастыҥ үөрэнээччитэ Алина Мартынова, салайааччылара саха тылын уонна литературатын учуутала Матрена Макарова, баһылык солбуйааччыта Сахаяна Михайлова, история уонна обществознание учуутала, Алина күн күбэй ийэтэ Алёна Мартынова уонна технология учуутала Алина амарах аҕата Леонид Мартынов оҥорбут «Ийэ скверэ» бырайыактара кыайыылаах таҕыста.
Нэһилиэкпит сайдарын туһугар олохтоохтор кыайыылаах бырайыагы ытыс тыаһынан көрүстүлэр. Маннык олохтоох дьон санаатын истэр, үөрэтэр бырайыактар баар буоланнар үлэҕэ үтүмэн түмүктэри киллэрэр.
Ирина КОРЯКИНА-ОЛЕСОВА