Соморсуҥҥа 2024 сылга олохтоох көҕүлээһини өйүүр программаларга киирэр бырайыактары бигэргэтэ уонна үбүлээһиннэрин быһаарса кулууп дьиэтигэр элбэх киһи түмүстэ. Быйыл сайын ыытыллыбыт ыйытык түмүгүнэн үс бырайыак интернет ситимин нөҥүө куоластааһыҥҥа тахсыбыта.
Ол курдук, алтынньы 31 күнүгэр нэһилиэккэ киирии арка, дэриэбинэ суолларын оҥоруу, уонна уу баһар массыына ылыыта бырайыактартан, уу — тыын боппуруос буоларынан, ити кыһалҕаны быһаарарга баһыйар үгүс киһи куоластаата.
2024 сылга «1000 олбуор» программаҕа киирсэн, элбэх кыбартыыралаах уопсай дьиэ уонна орто оскуола икки ардыгар, элбэх хайысхалаах, дьон сынньанар, сайдар усулуобуйатын учуоттанан оҥоһуллубут, кыра паарка бырайыагын дьүүллэһэннэр бигэргэттилэр.
Маны сэргэ нэһилиэк олохтоохторо 2024 сылга, төрөөбүт дойдуларын сайдыытыгар улахан олугу уурбут Ленин аатынан холкуос 100 сыллаах үбүлүөйүн бэлиэтиир этиини биир санаанан ылыннылар. Холкуос 1974 сыллаахха 50 сыллаах үбүлүөйдээх ыһыаҕа тэрээһининэн, уйгутунан-быйаҥынан элбэх киһи өйүгэр-санаатыгар умнуллубаттык хаалан, билигин даҕаны кэрэ кэпсээн буолар. Дойдубут дьоһуннаах үбүлүөйүнэн нэһилиэк хас биирдии олохтооҕо, биир дойдулаахтарбыт ис сүрэхтэринэн ылынан, тэрийсэн, көмөлөһөн сайдыыны түстүүр үтүө тэрээһиннэр буолуохтарыгар бигэ эрэнэбит.
Хаартыскаҕа Ленин аатынан холкуос 50 сыллаах үбүлүөйүн бэлиэтээһиҥҥэ тураллар: гражданскай сэрии, Саһыл Сыһыы оборонатын геройа Петров Александр Федорович-Сашка Пулеметчик; 1963-1965сс. холкуос бэрэссэдээтэлэ Романов Василий Иванович; холкуос кылаабынай буҕаалтыра Старостин Спиридон Дмитриевич; Ленин уордьанын кавалера Куличкин Ефим Григорьевич; Амма улууһун байыаннай комиссара Мохначескай Иван Иосифович; Октябрьскай революция уордьан кавалера Николаев Василий Степанович; Ленин аатынан холкуос бэрэссэдээтэлэ Жирков Николай Иванович.
Надежда Белолюбская.