В.И. Жожиков аатынан улуустааҕы оҕо бибилэтиэкэтин үлэһиттэрэ бииртэн биир сонун, ураты күрэхтэри ааҕааччыларын ортолоругар тэрийэллэр. Бүгүн Юрий Борисов “Баһырҕастаах аттаах Баабый Баатыр” олоҥхотугар олоҕуран дьиэ кэргэнинэн куукулалары оҥоруу күрэҕин түмүктээтилэр.
Амма улууһун бары кэриэтэ нэһилиэктэриттэн үлэлэр киирбиттэр. Төрүт даҕаны, аныгылыы даҕаны матырыйааллартан бэрт уустук, ылбычча киһи сатаабат оҥоһуктарын дьүүллүүр сүбэ сыаналаатылар.
—Күрэххэ киирбит куукулалар бары даҕаны киһи болҕомтотун тардаллар. Хас биирдиилэрэ хатыламмат истииллээхтэр, инньэ гынан кыайыылааҕы быһаарар наһаа уустук буолла. Алтыа буолан сүбэлэһэн-сүбэлэһэн, мөккүһэн түмүгү таһаардыбыт. Быһаарыныы ылынарбытыгар оҥоһук илиинэн оҥоһуллубутугар, кыра ымпыктарыгар-чымпыктарыгар болҕомто ууруллубутугар, туттар матырыйаал сэдэҕэр ордук оҕуннубут,- диэн дьүүллүүр сүбэ чилиэнэ, бибилэтиэкэ дириэктэрин солбуйааччы Светлана Макарова сырдатар.
Элбэх дьүүллэһии кэнниттэн куукула күрэҕин кыайыылааҕынан Сатаҕайтан Петя Пахомов “Баатыр ата” ааттанна. Иккис миэстэлээх Болугуртан Андриан, Октябрь Валерьевич Аянитовтар “Аал Луук мас” үлэлэрэ буолла. Үһүс бириистээх миэстэни Чакыртан 9 кылаас үөрэнээччитэ Юля Игнатьева “Сорук Боллур” куукулата буолла. Маны сэргэ дьүүллүүр сүбэ куттарын туппут өссө үс үлэ анал ааттар хаһаайыннарынан буоллулар: “Уран оҥоһук” – Ксенофонтова Милана (Сулҕаччы) “Дарҕан тойон” үлэтэ, “Уус уран оҥоһук” – Сэргэ Бэстэн Александровтар дьиэ кэргэн эбэлэринээн Е.И. Максимовалыын “Далбар Хотун” оҥоһуктара, “Чочуонай оҥоһук” – Аурика Шамшиева (Амма) – “Аан Дьигистэй” оҥоһуга.
“Амма олоҕо” хаһыат.