Бүгүн, бэс ыйын 19 күнүттэн алгыстаах Амма сиригэр Олоҥхо ыһыаҕын тэрээһиннэрэ саҕаланнылар. Бастакынан көмүс киистэлээх ураты буочардаах, айылҕаттан айдарыылаах биир дойдулаахтарбыт уруһуйдарын быыстапката дьон-сэргэ, ыалдьыттар болҕомтолоругар турдулар.
Ол курдук, Россия худуоһунньуктарын сойууһун чилиэнэ, СӨ култууратын туйгуна Николай Рязанскай, норуот маастара, СӨ култууратын туйгуна, Россия худуоһунньуктарын сойууһун чилиэнэ Ньургуйаана Никифорова – Ойууна, норуот маастара, СӨ култууратын туйгуна, Россий худуоһунньуктарын сойууһун чилиэнэ Ульяна Нохсорова айымньыларын бар дьоммут сэргээтилэр.
Үөрүүлээх тэрээһиҥҥэ СӨ култууратын уонна духуобунай сайдыы миниистирэ Афанасий Ноев, СӨ Ил Түмэнин бэрэссэдээтэлин бастакы солбуйааччы, Олоҥхо кэмитиэтин бэрэссэдээтэлэ Александр Жирков, СӨ национальнай архыыбын дириэктэрэ Петр Румянцев, СӨ Дархан этээччитэ, СӨ култууратын туйгуна, олоҥхоһут Виталий Никифоров, Амма улууһун баһылыгын социальнай боппуруостарга солбуйааччы Нюргуяна Илларионова кыттыыны ыллылар.
-Бүтүн өрөспүүбүлүкэ, ону ааһан Россия араас куораттарыттан, Кытайтан ыҥырыылаах ыалдьыттары түмпүт улахан түһүлгэҕэ үлэлэрбит турбуттара улахан үөрүүлээх, долгутуулаах. Мин «Удьурхай Боотур» хартыынан олоҥхо-остуоруйабын Аммаҕа ыытыллар Олоҥхо ыһыаҕар анаан-минээн 8 ый устата суруйдум. Онон бу иннинэ дьон дьүүлүгэр, сыанабылыгар тахсыбатах үлэм интэриэһи тардыа диэн эрэнэбин,- диир Сулҕаччы нэһилиэхгин убаастанар, ураты талааннаах худуоһунньуга, Аан дойдутааҕы «Юнеско» худуоһунньуктар федерацияларын кыһыл көмүс мэтээлин хаһаайына Николай Рязанскай.
Онон, киистэ кистэлэҥнэрин сэргээччилэр Амма талааннаахтарын быыстапкаларын Ф.Потапов аатынан норуот айымньытын дьиэтин фойетыгар көрүөххүтүн сөп. Киһи сэргиирэ, хайгыыра, соһуйара даҕаны үгүс. Холобура, Николай Рязанскай хартыынанан олоҥхолорун куйаар-куодунан киирэн истиэххэ сөп. Олоҥхо тылын-өһүн худуоһунньук балта Наталия Рязанская суруйбут.
«Амма олоҕо» хаһыат.