Уонтан тахса эрэ хонугунан улууска өрөспүүбүлүкэтээҕи Олоҥхо ыһыаҕа ыһыллан дьон-сэргэ тоҕуоруһа мустуо. Бэс ыйын 19-21 күннэригэр араас элбэх тэрээһин ыытыллара күүтүллэр. Ол курдук араас быыстапкалар, спортивнай да, култуурунай да күрэхтэр үс күн устата тиһигин быспакка буолуохтара.
«Күн бүгүн ыһыах бырагыраамата өрөспүүбүлүкэтээҕи хамыыһыйанан бигэргэтиллэн тураллар. Ол быһыытынан үлэ барар. Бэс ыйын 19 күнүгэр биһиэхэ быыстапкалар аһыллаллар, Олоҥхо ыһыаҕар ананан тахсыбыт хас да кинигэ сүрэхтэниитэ, улууска олоҥхо сайдыытыгар улахан кылаатын киллэрбит, педагог-наставник Анисия Даниловна Софронова пааматынньыгын арыйыы, уустар түһүлгэлэрин арыллыыта уонна да атын тэрээһиннэр буолуохтара. Ону сэргэ биир саамай долгутуулаах сиэр-туом, күнү көрсүү ыытыллыа. Дьэ онтон бэс ыйын 20 күнүгэр күнүс 11 чаастан үгэс быһыытынан «Саҥарар саҥам сататын, этэр тылым эгэлгэтин эридьиэстээҥ» диэн ыһыахпыт аһыллыыта буолар. Онтон бэс ыйын 21 күнүгэр киэһэ 6 чаастан ыһыахпытын үөрүүлээхтик сабыахпыт уонна ыһыах ытык дуоҕатын Нерюнгри улууһун дэлэгээссийэтигэр туттарыахпыт. Тоҕо диэтэр, билэргит курдук, кэлэр сылга Олоҥхо ыһыаҕа Нерюнгри улууһугар ыытыллар. Быйылгы ыһыахпыт аһыллыытын сиэрин-туомун режиссера биир дойдулаахпыт, өрөспүүбүлүкэ искусствотын үтүөлээх деятелэ Мария Маркеловна Маркова, театрализованнай туруоруутун режиссера бары ытыктыыр киһибит, Саха циркэтин дириэктэрэ Сергей Васильевич Расторгуев. Манна биһиги Үстүүн Нохсоороп “Дыырай Бэргэн” олоҥхотун сюжетигэр олоҕуран үгэс буолбут ньыманан олоҥхону толоруохпут, онтон ол толорууну артыыстар оонньоон көрдөрүөхтэрэ. Маннык олоҥхону толоруу өссө ханна да буола илик. Көннөрү театрализованнай эрэ буолар этэ. Бу үлэбит научнай сүбэһитэ, Үстүүн Нохсоороп айымньыларын чинчийэн үөрэтэр Виктория Георгиевна Григорьева буолар. Кини билигин биһиэхэ барыбытыгар Үстүүн Нохсоороп үстүү охсуулаах тойугун үөрэтэ сылдьар. Ол курдук 9 олоҥхоһут олоҥхолуу, кэпсии олоруоҕа, ол кэмҥэ ол кэпсииллэрэ, олоҥхолууллара барыта театрализацияланан көстүөҕэ. Дьэ ити ыһыахпыт аһыллыытын уратыта буолуо. Онтон ыһыах сабыллыытын режиссера, олоҥхо тыйаатырын режиссера Павел Колесов буолар. Онон бу тэрээһиннэр эмиэ олох ураты буолуохтара диэн күүтэбит. Манна арыллыыга 1300 киһи кыттара күүтүллэр. Сотору кэминэн репетициялар саҕаланыахтара. Бэс ыйын 3 күнүттэн мас уустара кэлэн олоҥхо персонажтарын маска кыһан оҥоро сылдьаллар. Бу үлэ бэс ыйын 5 күнүн түмүктүүллэр. Кинилэр үлэлэрин ыһыахха кэлбит дьон сэргии көрүөхтэрэ диэн эрэнэбит”, — диэн Амма улууһун култуураҕа уонна норуот айымньытыгар салалтатын салайааччыта Иван Иванов сырдатар.
Ыһыах култуурунай тэрээһиннэригэр туох киирэрин, ханнык күрэхтэр буолалларын, ханнык кэнсиэри көрүөхпүтүн сөбүн туһунан Иван Федоровичтыын кэпсэтиини “Амма олоҕо” хаһыат бэс ыйын 7 күнүнээҕи нүөмэригэр сиһилии ааҕан билсээрин.
“Амма олоҕо” хаһыат