2024 сыл бэс ыйын 19-21 күннэригэр Амма улууһугар Амматааҕы И.А. Швердин аатынан культура уонна сынньалаҥ пааркатыгар Олоҥхо ыһыаҕа аан бастаан ыытыллар. Олоҥхо ыһыаҕын ыытыы өрөспүүбүлүкэтээҕи тэрийэр кэмитиэт бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Сергей Местников Олоҥхо ыһыаҕар бэлэмнэнии чэрчитинэн улуус дьаһалтатын аактабай саалатыгар Бырабыыталыстыба көһө сылдьар мунньаҕын ыытта.
Мунньахха тыа хаһаайыстыбатын миниистирэ Артем Александров, Ил Түмэн дьокутаата Александр Корякин, СӨ культура уонна духуобунай сайдыы миниистирэ Афанасий Ноев, СӨ Государственнай циркэтин дириэктэрэ, уус-уран салайааччыта Сергей Расторгуев, «Уран» ХЭТ дизайн-студия генеральнай дириэктэрэ Вячеслав Яроев уонна улууспут салалтата кытыннылар.
Сүрүн дакылааты улууспут баһылыга Степан Кузьмин оҥордо. Культурнай программалар тустарынан улуус баһылыгын социальнай боппуруостарга солбуйааччы Нюргуяна Илларионова, тутуу чааһын баһылыгы тутууга солбуйааччы Виктор Смирников иһитиннэрдилэр.
Олоҥхо ыһыаҕын сүрүн режиссерунан СӨ уонна РФ үтүөлээх артыыһа Сергей Расторгуев, сценариһынан СӨ культуратын үтүөлээх үлэһитэ Саргылана Гольдерова — Саргы Куо буолаллар. Мунньахха Сергей Васильевич биир дойдулаахтарыгар туһаайан, 2019 сылга Саха сирин норуоттарын сэттис спортивнай оонньууларын үрдүк таһымҥа ыыппыппыт курдук, Олоҥхо ыһыаҕын үөрүүлээх аһыллыытын уонна сабыллыытын эмиэ оннук бука бары бииргэ түмсэн ыытарга ыҥырда.
Мунньахха Аммабыт пааркатын ыһыахтыыр түһүлгэтин сүрүн объектарын оҥорор, кылаабынай бэдэрээтчит, «Уран» ХЭТ дизайн-студият генеральнай дириэктэрэ Вячеслав Яроев кытынна. Билиҥҥи туругунан ыһыахтыыр түһүлгэ бырайыага бүтүннүү оҥоһуллан бүтэн, тутуу үлэлэрэ саҕаламмыттар. Вячеслав Васильевич үгүс дьону долгутар Аал Луук Мас тутуутугар тохтоото. Аммалар мааны маспыт оҥоһуутугар киэн туттар биир дойдулаахпыт, Сулҕаччыга улааппыт биллэр худуоһунньук, этнограф, кыраайы үөрэтээччи, ССРС худуоһунньуктарын сойууһун чилиэнэ, Саха АССР норуодунай худуоһунньуга, РСФСР искусствотын үтүөлээх деятелэ Михаил Михайлович Носов уруһуйа тирэх буолбутун иһитиннэрдэ.
Мунньах түмүгэр СӨ Бырабыыталыстыбатын бэрэссэдээтэлин солбуйааччы Сергей Местников санаатын үллэһиннэ:
— Аммалар хаһан да, ханна да буолбатаҕы оҥорор уратылааххыт. Онон талааннаах биир дойдулааххыт, Олоҥхо ыһыаҕын кылаабынай режиссера Сергей Васильевич режиссерскай толкуйдарын олоххо киллэрэргэ Амма улууһун 14 нэһилиэгин дьоно-сэргэтэ бары биир киһи курдук күүскэ турунан, күргүөмнээхтик үлэлиэххитигэр эрэнэбин. Маны таһынан Амма улууһун дьаһалтата, улуус олохтоохторо маннык улахан таһымнаах тэрээһиннэри ыытар уопуттаах, үгүс ыалдьыты көрсөр, түһэрэр, аһынан хааччыйар кыахтааххыт, — диэн бэлиэтээн эттэ.
Вера ИВАНОВА.