Балаҕан ыйын 6 күнүгэр В.Г. Короленко аатынан Амма бастакы нүөмэрдээх орто оскуолатын аактабай саалатыгар биир дойдулаахпыт, Дьокуускайдааҕы М.К. Аммосов аатынан ХИФУ Олоҥхо научнай-чинчийэр үнүстүүтүн «Лингвофольклористика» сиэктэрин салайааччыта, тыл билимин хандьыдаата Юрий Борисов «Баһырҕастаах аттаах Баабый Баатыр» диэн олоҥхото саҥалыы тыыннанан күн сирин көрбүт кинигэтин үөрүүлээх сүрэхтэниитэ буолан ааста. Тэрээһин саҕаланыыта испэктээк сүрүн дьоруойа Сандал Васильев «Баһырҕастаах аттаах Баабый Баатыр» олоҥхоттон быһа тардан олоҥхолоото, бүгүҥҥү долгутуулаах тэрээһиҥҥэ мустубут ыалдьыттары олоҥхо алыптаах кэрэ эйгэтигэр киллэрдэ.
Бүгүҥҥү үөрүүлээх тэрээһиҥҥэ кинигэ ааптара Юрий Борисов кэккэ биричиинэнэн кыайан кэлбэккэ зуум ситиминэн холбонон саҥа тахсыбыт үлэтин туһунан сиһилии билиһиннэрдэ. Кинигэ күн сирин көрөн оҥоһуллан тахсарыгар үлэлээбит «Айар» киин оҕо-аймах уонна үөрэх кинигэтин кыһатын салайааччыта Марина Никифорова, эрэдээктэр Сардаана Тимофеева, олоҥхо Амма улууһун улахан сыанатыгар – Федот Потапов аатынан норуот айымньытын дьиэтигэр музыкальнай-хореографическай испэктээк бырайыагын ааптара Ньургустаана Тылбыкова, испэктээк сынаарыйын ааптара, туруорааччы режиссер, «Сир симэҕэ» Арассыыйа көрдөрүүлээх, Саха Өрөспүүбүлүкэтин норуодунай ансаамбылын салайааччыта Марианна Ефимова кинигэҕэ үлэлээбит сыралаах түбүктэрин сиһилии көрөөччүлэр иннилэригэр сырдаттылар. Маны таһынан «Айар» киин оҕо-аймах уонна үөрэх кинигэтин кыһатын аатыттан махтал суругунан Ньургустана Тылбыкова, Марианна Ефимова уонна кинигэ худуоһунньуга Кыыма Жиркова наҕараадаланнылар.
Тэрээһин иккис чааһыгар эҕэрдэ тылы Амма улууһун үөрэҕириитин салаатын начальнига Юрий Шишигин, В. Короленко аатынан Амма бастакы нүөмэрдээх орто оскуолатын дириэктэрэ Николай Ларионов, , 9 «б» кылаас төрөппүттэрин ааттарыттан төрөппүт сэбиэтин бэрэссэдээтэлэ Светлана Александровна эттилэр. Амма орто оскуолатын кэлэктиибин аатыттан махтал суругунан Юрий Борисов, Марина Никифорова уонна Сардаана Тимофеева наҕараадаланнылар. Итиэннэ билинии сертификата Марианна Ефимоваҕа, Ньургустаана Тылбыковаҕа туттарылынна. Оскуола кэллэктиибэ уонна Юрий Шишигин «Айар» киин оҕо-аймах уонна үөрэх кинигэтин кыһатын үлэһиттэригэр истиҥник махтаннылар, айымньылаах үлэлэригэр ситиһиилэри баҕардылар. Юрий Борисов уонна кини кинигэҕэ бииргэ үлэлээбит кэллиэгэлэрин ааттарыттан Юрий Шишигиҥҥа, Николай Ларионовка, Леонид Окороковка, Сергей Захаровка, Ньургуйаана Гаврильеваҕа, Сахайаана Харитоноваҕа «Баһырҕастаах аттаах Баабый Баатыр» саҥа олоҥхо кинигэлэрин бэлэх ууннулар.
Бүгүҥҥү үөрүүлээх тэрээһин туһунан «Баһырҕастаах аттаах Баабый Баатыр» олоҥхо кинигэтин ааптара Юрий Борисов санаатын маннык үллэстэр:
-Кинигэ биһирэмэ үрдүк таһымнаахтык, бэрт таһаарыылаахтык ааста. Маныаха Ньургустаана Николаевна уонна Марианна Васильевна сыраларын ууран үлэлээбиттэрэ өтө көстөр. Испэктээккэ оонньообут оҕолору көрөн олус үөрдүм, кылгаабыт санаам уһаата, кыараабыт көхсүм кэҥээтэ. Инники өттүгэр, 2024 сылга Аммаҕа ыытыллар Өрөспүүбүлүкэтээҕи Олоҥхо ыһыаҕын көрсө «Тоҕус хонугунан тура тэбинэн төрөөбүт тумул хара тыа тууллан түһэн иһэрин курдук тоһоҕо тураҕас аттаах Турантаайы Бэргэн» диэн саҥа олоҥхобун бүтэрэн, туспа кинигэнэн таһаарар былааннаахпын. Ол гынан баран, билиҥҥитэ бүтүөҕэ быдан курдук. Олох көрдөрөн иһиэҕэ»-диэн этэр.
«Амма чэчирэ» оҕо образцовай ансаамбылын фольклорга уһуйааччыта Сахайаана Харитонова салайар Амма орто оскуолатын 9 «б» кылааһын кыргыттара «Үчүгэйиэн алааспар» диэн норуот ырыатын толороннор тэрээһин силигин ситэрэн биэрдилэр.
Артем ОСИПОВ.