Бүгүн Н.Е.Иванов аатынан Бөтүҥ орто оскуолатын тэрээһининэн улуус оскуолаларын суоппардарын икки ардыларыгар «Бастыҥ суоппар» күрэх ыытылынна. Күрэх идэни талыыга, суоппардар таһымнарын үрдэтиигэ, суолга сэрэхтээх буолууга, суол бэрээдэгин тутуһууга туһуланна уонна 2017 сыллаах күрэх кыайыылааҕар, бэтэрээн суоппар Никифоров Михаил Иннокентьевич 65 сааһыгар ананна.
Сонун, интэриэһинэй күрэх тэрийиитин Амма улууһун үөрэҕириитин управлениета, профсойууһун кэмитиэтэ, суолга сэрэхтээх буолуу инспекцията, Бөтүҥ нэһилиэгин дьаһалтата, Амма 1 №-дээх оскуола өйөөтүлэр, сүрүн көмө буоллулар.
Быйыл барыта 6 оскуола суоппардара күннээҕи эппиэтинэстээх үлэлэриттэн быыс булан күөн көрүстүлэр: Абаҕа, Амма Наахара, Бөтүҥ, Мээндиги, Сулҕаччы, Эмис.
Күрэх 3 түһүмэҕинэн буолла – бастакынан Амма 1№-дээх оскуолатын автодромугар массыынанан сорудахтары толоруу, компьютерга суол быраабылатын билиини тургутар тест уонна задачалары суоттааһын.
Дьүүллүүр сүбэҕэ суолга куттал суох буолуутун инспекциятын начальнига Валерий Тылбыков, инспектор Яков Слепцов, автошкола уопуттаах салайааччыта Анатолий Лягушин, инструктор Владимир Александров үлэлээтилэр.
Олус тыҥааһыннаах киирсии түмүгүнэн кыайыылааҕынан Эмис оскуолатын суоппара Ньургун Устинов тахсан Никифоров Михаил Иннокентьевич анал бирииһин тутта, иккис миэстэлээх Бөтүҥ оскуолатын суоппара Егор Бессонов үөрэх управлениетын профкомун бирииһинэн наҕараадаланна, үһүс бириистээх миэстэҕэ тахсыбыт Абаҕа оскуолатын суоппара Сергей Сутаков Бөтүҥ дьаһалтата туруорбут бирииһинэн бэлиэтэннэ.
Манна даҕатан эттэххэ, Бөтүҥ оскуолатын салалтата автошкола арыйар улахан баҕа санаалаах. Аныгы олох ирдэбилинэн сотору кэминэн оҕолор массыына ыытарга үөрэнэр кылаастара арылларыгар бары күүспүтүн ууран үлэлиибит.
Акулина Иванова.