Эмис нэһилиэгэр көҕөрдүү үлэтэ көхтөөхтүк ыытылынна. Оскуола кэлэктиибэ, үөрэнээччилэр бу үлэҕэ күргүөмүнэн тахсан үлэлээтилэр.
Эмис нэһилиэгин олохтоох дьаһалтата уулуссаны көҕөрдүүгэ анаан анал полисадниктары оҥорбута. Төһө да күһүҥҥү ардахпыт тохтообокко түстэр, бу палисадниктарга мас олордуутугар субуотунньук көхтөөхтүк барда. Ол курдук Улуу Кыайыы 80 сылын керсө, ону тэҥэ Саха Өрөспүүбүлүкэтин Судаарыстыбыннаһын күнүнэн көҕөрдүү үлэтэ барда. Оскуола оҕолоро уонна үлэһиттэр түөлбэ аайы кыттыһан 8 харыйа, 10 тиит, 10 хатыҥ мастары үллэрэн олортулар.
Ону тэҥэ оскуола иһигэр анал байыаннай дьайыы Саха сирин геройдарыгар анаммыт стендэтин аһыллыыта буолла. Оскуолаҕа юнармия этэрээтин 9 кылааһын оҕолоро «Алеша» патриотическэй тэтэрээттэри, хас биирдии үөрэнээччигэ үөрүүлээх быһыыга-майгыга туттардылар. Оскуола дириэктэрэ Гаврил Захаров уонна педагог-бибилэтиэкэр Ульяна Захарова геройдар тустарынан, кинилэр хорсун санааларын оҕолорго кэпсээтилэр.
Эрчим НИКОЛАЕВ, “Кэскил” хаһыат эдэр корреспондена