Эмис нэһилиэгин В.М. Новиков- Күннүк Уурастыырап аатынан орто оскуола бэрт сэргэхтик олорор. Күннэтэ оскуолабытыгар араас тэрээһиннэр буолаллар. Манна барытыгар көхтөөх кыттыыны ылабыт.
Оҕо эт-хаан өттүнэн сайдарыгар успуордунан дьарык олус көмөлөөх. Оскуолабытыгар күн ахсын араас секциялар, дьарыктар, хамаанданан күрэхтэр буолаллар. Манна үгүс оҕо дьаныардаахтык дьарыктанан элбэх ситиһиилэнэллэрэ саарбаҕа суох.
Күһүҥҥү сынньалаҥ кэмин тустуук уолаттарбыт тренердэрин Аркадий Тастыгины кытта Мэҥэ-Хаҥалас улууһун Тумул нэһилиэгэр тиийэн, тустуу араас ньымаларыгар үөрэнэн, дьарыктанан кэллилэр.
“Эмистэн тохсуо буолан дьарыктанан кэллибит. Тустуу ураты сатабылын ылынан, элбэххэ үөрэнэн олус үчүгэйдик сырыттыбыт. Маннык сылдьан дьарыктанар наадалаах уонна туһалаах уопут буолар эбит. Тренербит Аркадий Николаевич бу биир биһигини үөрэтэр ньымата буолар, атын оҕолору кытары тустан элбэххэ үөрэнэр эбиккин”, — диэн Матвей Тимофеев санаатын үллэһиннэ.
Маны сэргэ, волейболистарбыт ыаллыы сытар Бырама нэһилиэгэр тиийэн оонньоон, кыайыы көтөллөөх кэлбиттэрэ. Саха куттаах эрэ барыта, кыһын кэлиитигэр Күөх Боллох иччитигэр үҥэн-сүктэн, көмүс хатырыктааҕыттан бэриһиннэрэр, күндүлэтэр үгэстээх. Үтүө үгэспитинэн, үөрэх иккис чиэппэрэ саҕаланыыта, Илин Тэгэрээттэ эбэҕэ оскуола муҥхата буолбута. Манна улуус 5 оскуолатыттан кэлэн барыта 90-ча киһи кыттыбыта. Эбэбит барахсан көмүс хатырыктааҕыттан балачча бэрсэн, илии тутуурдаах, өттүк харалаах тарҕастыбыт.
Тыа сиригэр биир саамай тыын суолталаах үлэтинэн буолар-муус ылыыта. Хас сылын ахсын оскуолабыт улахан кылааһын уолаттара уонна эр дьоно кыһыҥҥы хаһаас мууспутун ылан, тиэйэн оскуола таһыгар сааһылаан кэбистилэр. Бары ыраас ууну астын-дуоһуйа иһиэхпит. Оскуолабыт төрөөбүт күнүн көрсө уонна уйулҕа ыйын чэрчитинэн “Следопыт” оонньууну оонньоон оскуолабыт үлэһиттэрин, учууталларын туһунан ыйытыыларга эппиэттээн элбэҕи биллибит. Оскуола бибилэтиэкэрэ Ульяна Захарова Улуу Өктөөп күнүгэр 1941 сыллаахха Москуба куоракка буолбут байыаннай парад туһунан олус интэриэһинэй бэсиэдэни ыыппытын бары сэргээн иһиттибит, олус элбэҕи биллибит.
Бу курдук, Эмис оскуолатын үөрэнээччилэрэ, учууталлара олус сэргэхтик, барыга көхтөөхтүк түмсэн үлэлии-үөрэнэ олоробут.
Айна УСТИНОВА, Эмис ОО “Күн оҕолоро” түмсүү юнкора