Арассыыйа аҕаларын күнүн көрсө Эмис орто оскуолатыгар аҕаларга анаан «Аҕа — ыал бигэ тирэҕэ» диэн ааттаах өркөн өй күөн күрэһэ бэрт интэриэһинэйдик буолан ааста. Күрэхтэһиини оскуола дьаһалтата, бибиэлэтиэкэтэ бэрт сэргэхтик тэрийэн ыыттылар.
Аҕалары тургутар күрэххэ сэттэ аҕа кытынна. Ол курдук Никита Иванов, Александр Лебедев, Илья Кириллин, Авдей Тимофеев, Альберт Соловьев, Максим Чемезов уонна Юрий Солдатов. Аҕалар уон түһүмэхтээх күрэскэ илин-кэлин түһүстүлэр. Дьүүллүүр сүбэҕэ оскуола иһинэн үлэлиир үөрэнээччилэр бэйэни салайыныытын оҕолоро Алеша Платонов, Алина Золотова, Дима Захаров бэрт эппиэтинэстээхтик сыһыаннаһан үлэлээтилэр.
Түһүмэхтэр аҕаларга сыһыаннаан сылгы дьүһүнүн, ыйдар сахалыы ааттарын, Арассыыйа, Саха сирин салайааччылыларын, кус -кыыл аатын билиигэ, «Алаадьы» диэн остуол оонньуутугар, Сэбиэскэй Сойуус Геройдарын төһө билэллэригэр, сахалыы ырыаны таайыыга, көрдөөх кэпсээни кэпсииргэ толкуйданан оҥоһуллубуттара. Бу барыта ыал аҕата мындырын, толкуйун, тобуллаҕас өйүн бары өттүнэн тургутта. Түмүккэ, бары даҕаны эрбии биитин курдук, тэҥҥэ эллэстилэр.
Дьэ ол гынан баран уопсай түмүккэ Альберт Спиридонович Соловьев эрэллээхтик бастаата. Иккис миэстэни Юрий Николаевич Солдатов уонна үһүс миэстэни Максим Егорорович Чемезов ыллылар. дипломнарынан бэлиэтэннилэр. Бары кыттыыны ылбыт аҕаларбытыгар истиҥ махталбытын тиэрдэбит.Дьоһуннаах аҕа, иллээх дьиэ кэргэн, оҕо-уруу сайдар, үүнэр олуга. Бары аҕалары бу үөрүүлээх күнүнэн эҕэрдэлиибит!
Эмис орто оскуолатын «Күн оҕолоро» юнкор поһа