Бүгүн улуус дьаһалтатын аактабай саалатыгар СӨ тыа хаһаайыстыбатын миниистирин солбуйааччы Сахаяна Павлова кыттыылаах оттооһуҥҥа туһаайыллыбыт киэҥ ыҥырыылаах мунньах буолан ааста. Мунньахха нэһилиэктэр баһылыктара, тэрээһиннээх хаһаайыстыбалар салайааччылара, Амма нэһилиэгиттэн биирдиилээн отчуттар кыттыыны ыллылар. Кэпсэтиини улуус баһылыга Степан Кузьмин салайан ыытта.
Быйыл Амма улууһугар оттооһуҥҥа чахчы уустук балаһыанньа үөскээтэ. Бэс, от ыйдарыгар ардах үчүгэйдик түспэккэ, онно эбии бэс ыйын саҕаланыыта тымныы буолан, от аанньа үүммэтэ. Онон быйылгы сорук, ол эбэтэр 28915 тонна от былааныттан 75 быраһыанын булуу. Манна былырыыҥҥы кур от эбии буолуоҕа. Сүрүн иһитиннэриини, улууска оттооһун хаамыытын, ханнык нэһилиэктэргэ ордук уустук балаһыанньа баарын, ханнык соруктар туралларын тыа хаһаайыстыбатын управлениетын салайааччыта Ион Кононов мунньах кыттыылаахтарыгар, миниистир солбуйааччытыгар тириэртэ.
СӨ тыа хаһаайыстыбатын миниистирин солбуйааччы Сахаяна Павлова быйыл Амма эрэ улууһугар буолбакка, Саха сирин үгүс улуустарыгар курааннаабытын, сөҥүү түһэрэ сылтан сыл аҕыйаан иһэрин бэлиэтээбиттэрин, онон инникитин мелиоративнай үлэлэлэргэ болҕомтону уурар хайаатар да наадатын, маныаха федеральнай бырагыраамаларга кыттар көдьүүстээҕин эттэ.
“Амма улууһа өрөспүүбүлүкэҕэ саамай иҥэмтиэлээх буордаах улуус буолар. Эһиэхэ кылаабынайа уу эрэ наада. Уонна төһө баҕарар эбии аһылык буолар соҕуруу үүнэр оттору ыһан олордуохха сөп. Нэһилиэктэр үксүтэ кэриэтэ өрүһү өҥөйө олороҕут. Ону туһаныахха наада”, — диэн Сахаяна Афанасьевна бэйэтэ учуонай агроном быһыытынан санаатын, сүбэтин тириэртэ.
Мунньахха нэһилиэк баһылыктара Амматтан солбуйааччы Альберт Яковлев, Болугуртан Андрей Петров, Бөтүҥтэн Алексей Никитин, Мээндигиттэн Илья Семенов, Чапчылҕантан солбуйааччы Афанасий Уваров, Абаҕаттан Максим Семенов, Эмистэн Прокопий Бубякин, Соморсунтан Алексей Кононов, Чакыртан Иннокентий Тарасов, ону сэргэ “Кэскил” ХЭТ бэрэссэдээтэлэ Александр Карманов, Строд аатынан ТХПК бэрэссэдээтэлэ Василий Тимофеев, “Амма” ААУо генеральнай дириэктэрэ Роман Спасьев санааларын үллэһиннилэр, баар балаһыанньаларын кэпсээтилэр. Кинилэр иһитиннэриилэригэр от үүнүүтэ мөлтөҕүн, тиийбэт оту атыылаһыыга сайаапка хомуйулла сылдьарын эттилэр, министиэристибэттэн оту тиэйиигэ-аҕалыыга көмө көрүллэрэ наадатын бэлиэтээтилэр. Нэһилиэктэр үксэ кэриэтэ тириэрдиллибит соруктарын 70-80 бырыһыан толорорго дьулуһалларын эттилэр.
“От тиэйиитигэр-аҕалыытыгар бэриллэр субсидияҕа эрэнэн олорор табыллыбат. Хайаатар да сэрбэйбити, талахтар быыстарын кытта оттоон миэстэтигэр оту хайа баҕарар булуохха сөп. Онон баһылыктар миэстэтигэр чааһынай дьон оту булалларын курдук үлэни тэрийиэххитин наада. Атырдьах ыйын 15 күнүттэн үгэс быһыытынан “көҥүл хотуур” биллэриллиэ. Онон хаалбыт сирдэри барытын билсэн оттооһуну күүскэ ыытын. От сыаната быйыл биир тонната 10-15 тыһыынчаҕа тиийиэ. Онон атыыласпыттааҕар манна миэстэтигэр сирийэн оттоон тиийбэт оппутун булунуоҕуҥ”, — диэн улуус баһылыга Степан Кузьмин түмүк тылыгар тириэртэ.
Мунньах, оттооһун балаһыанньатын туһунан сиһилии хаһыаппыт кэлэр нэдиэлэҕэ тахсар нүөмэригэр сиһилии билиһиннэриэхпит.
“Амма олоҕо” хаһыат