Амма улууһун педагог-библиотекардарын “Ааҕааччыттан – театрга” методическай семинардара Абаҕа орто оскуолатыгар үрдүк таһымнаахтык ааста.
Билиҥҥи сайдыылаах, аныгы кэмҥэ оҕо ааҕыыттан тэйэн эрэрэ хас биирдии киһини долгутар, тыҥаан кэлбит кыһалҕабыт буолбута кистэл буолбатах. Онон сиэттэрэн быйылгы семинарга педагог- библиотекардар хайдах, тугу гынан, ханнык ньыманы туһанан оҕону ааҕыы эйгэтигэр угуйуохха сөбүн, бэйэлэрин үлэлэлэринэн-хамнастарынан сырдатан көрдөрдүлэр. Ол курдук семинарга Абаҕа оскуолатын педагог-библиотекара Надежда Николаевна Яковлева «Абаҕа учууталлара – нэһилиэк историятын кэрэһиттэрэ», Майскай орто оскуолатыттан Михайлова Юлия Николаевна «Театральные ступеньки» уруогу таһынан дьарык уопутуттан, Эмис орто оскуолатыттан Ульяна Устиновна Захарова «Өйү сайыннарар оонньуулар нөҥүө оҕону ааҕыыга уһуйуу» маастар-кылааһы уонна Чакыр орто оскуолатыттан Светлана Николаевна Новикова «Үҥкүү хамсаныыларынан олоҥхону үөрэтии» В.М. Новиков-Күннүк Уурастыырап «Нуоҕалдьын кугас аттаах Тойон Дьаҕарыма» олоҥхотунан хамсаныылаах тренинг ыытан көрдөрдүлэр .
Семинар түмүк чааһыгар улуус оскуолаларын педагог- библиотекардара бүгүҥҥү дьарыктары ырыттылар, минньигэс астаах остуол тула олорон, ирэ-хоро кэпсэттилэр, инники былааннарын торумнастылар. Олус ыалдьытымсах, эйэҕэс-сайаҕас Алгыстаах Абаҕа оскуолатын коллективар махталларын биллэрэн, үөрэн-көтөн тарҕастылар.
Наталия Рязанская.