Петр Калачев “Хааччыллыыбыт быдан тубуста”

Ойуур баһаара таҕыста да, хомуна охсон айанныыр, тыаҕа сылдьан уоту туттартан сэрэтэр үлэни ыытар тэрилтэнэн ГАУ “Якутлесресурс” буолар. Ыам ыйын саҥатыгар тахсыбыт баһаардары умулларыыга тэрилтэ үлэһиттэрэ техникаларын илдьэ тахсан күүскэ үлэлээн кылгас болдьох иһигэр туруоруллубут соруктарын толорбуттара. Тэрилтэ салайааччыта Петр Калачевы кытта тахсыбыт баһаардары умуруоруу, хааччыллыы туһунан ыйыталастыбыт.


Петр Константинович, билэргит курдук улууспутугар үс тыа баһаара тахса сырытта. Эһиги тэрилтэҕит баһаары умуруорууга үлэтин туһунан кылгастык сырдатан ылыан дуо?

  • Биһиги тэрилтэ ыам ыйын 7-8 күннэригэр Покровка нэһилиэгин территориятыгар тахсыбыт ойуур баһаарын умуруорууга үлэлээтибит. Ол курдук тэрилтэттэн 15 киһи, 4 техника, Покровкаттан 15 олохтоох киһи, 1 техника, ону таһынан 5 баһаарынай сулууспа үлэһиттэрэ биир УАЗ массыыналарын илдьэ тахсан, бары көмөлөөн тахсыбыт баһаары умуруордубут. 10 га ойуур уонна 10 га ходуһа сиригэр уот барда. Тахсыбыт баһаар киһи сэрэҕэ суоҕуттан барда диэххэ наада. Ол курдук кырдьаҕас булчут табаҕын уотун бырахпытыттан, кураанах окко түһэн, ойуурга киирбит. Онон өссө төгүл сэрэтэбит, тыаҕа сылдьан уоту туттаргытыгар олох сэрэхтээх буолуохха наада. Көрөргүт курдук биир табах уотуттан улахан баһаар буола сырытта. Онно умуруорууга элбэх киһи, техника үлэлээтэ.

-Техника диэн эттин. Тэрилтэҕит бу өртүгэр хааччыллыыта хайдаҕый?

  • 2020 сылтан ыла саҕалаан техниканан күүскэ хааччыллабыт диэххэ наада. Ол курдук холобура гусеницалаах техниканы таһарга траллаах КАМАЗ массыына кэлбитэ. Аны баһаары умуоруорууга туттуллар араас тэриллэр, оборудование, бэйэни харыстанарга туттуллар тэриллэр сыллата кэлэ тураллар. Быйыл да хааччыллыы баар. Итини сэргэ саҥа “ГАЗ Соболь” микроавтобус, уу баһар массыына, квадроцикл, “ГАЗ САДКО” диэн бортовой массыына, икки гусеницалаах “Агромаш” диэн тыраахтырдар кэлбиттэрэ. Баһаары түргэнник булууга көмө буолар квадрокоптер, саһан сытар баһаары булууга туттуллар анал тэрил, ону таһынан мотопомпалар, эрбиилэр бааллар. Быһатын урукку сылларга холоотоххо хааччыллыы олох үчүгэй. Бу барыта тахсыбыт ойуур баһаарын умулларарбытыгар олох бигэ көмө буолаллар.

Эһиги сырдатар, баһаартан сэрэхтээх буолууга эмиэ үлэлэһэҕит буоллаҕа дии…

  • Оннук. Бу билигин баһаар суох кэмигэр нэһилиэктэринэн сыллдьан ойуурга сылдьан сэрэхтээх буолалларын ирдиир баннердары, аншлагтары туруорабыт. Дьон сынньанар сирдэринэн кутаа уотун оттор анал сирдэри бэлэмниибит. Ойуурга киириигэ шлагбаумнары туруорабыт. Улууска ойуур баһаарыттан сэрэхтээх буолуу эрэсиимэ биллэриллэҕинэ, шлагбаум сабыллан, дьон ойуурга киирэрэ бобуллар.

-Петр Константинович, эппиэттэрин иһин махтал!

 

“Амма олоҕо” хаһыат

Читайте дальше