“Почта России” Амматааҕы филиалыгар араас кэмнэргэ үлэлээн ааспыт почта сибээһин бэтэрээннэрэ муһуннулар. Көрсүһүү түмүгүнэн бэтэрээннэр сэбиэттэрэ тэрилиннэ, бэрэссэдээтэлэ талылынна.
Улуус олохтоохторугар сурунааллары, хаһыаттары, суруктары тириэрдэр тэрилтэҕэ сүүстэн тахса бэтэрээннээх. Ол гынан бу күҥҥэ диэри кинилэр бииргэ мустан кэпсэтэр, сүбэлэһэр сэбиэттэрэ да, хосторо да суох олорбуттара. Быйыл саҥа ананан кэлэн үлэлээн эрэр начальник Варвара Шадрина бу итэҕэһи туоратар сыаллаах, бэтэрээннэри ыҥыран сүбэ мунньах ыытта. Манна кыттыыны улуус бэтэрээннэрин Сэбиэтин бэрэссэдээтэлэ Мария Захарова кыттыыны ылан, көрсүһүү түмүгүнэн почта бэтэрээннэрин түмэр Сэбиэт тэриллиннэ.
“Биһиги тэрилтэбит улууска биир кырдьаҕас тэрилтэ буолар. Манна араас кэмҥэ үлэлээн ааспыт бэтэрээннэрбит өрөспүүбүлүкэ араас муннуктарыгар, улууспутугар да олороллор. Уопсайа ааҕан көрүүбүтүнэн сүүстэн тахса бэтэрээннээх эбиппит. Онон кинилэри түмэр инниттэн Сэбиэттэ тэрийиэҕиҥ диэн быһаардыбыт. Мунньахха кэлбит бэтэрээннэр улуус сэбиэтин бэтэрээннэригэр киирэри сөптөөҕүнэн аахтылар. Манна бары сүбэлэһэн баран биир санаанан Сэбиэт бэрэссэдээтэлинэн өр сылларга почта отделениетын начальнигынан үлэлээбит Надежда Борисовна Черемных буолла. Кинилэр көрсүһэллэригэр анаан хос анаатыбыт. Манна өссө музей тэрийиэхпит. Биэс киһиттэн састааптаах актив тэрилиннэ. Онно Джемма Абрамовна Иванова, Лариса Михайловна Соловьева, Лариса Станиславна Неустроева, Людмила Михайловна Барашкова киирдилэр. Манна даҕатан эттэххэ, бүгүн улуус баһылыгын планеркатыгар кыттыыны ыламмын, оскуолаҕа үлэ уруоктарыгар бэтэрээннэргэ, кырдьаҕастарга уонна анал байыаннай дьайыы кыттыылаахтарын дьиэ кэргэттэригэр анаан почта дьааһыктарын оҥорторуохха сөп этэ диэн этии киллэрдим. Ону баһылык Степан Николаевич сэргээтэ уонна өйөөтө. Үөрэх управлениетыгар маны олоххо киллэриигэ ылсалларыгар сорудах биэрдэ”, — диэн Варвара Егоровна сырдатта.
“Амма олоҕо” хаһыат