Алдьархай хаһан тиийэн кэлэрин, эн ааҥҥын тоҥсуйарын хайа да киһи тымтыктанан көрбөт. Ол курдук биир дойдулаахпыт, өрөспүүбүлүкэҕэ бастыҥ үлэтинэн, үтүө сүрэҕинэн ытыктанар киһибит Руслан Федотов Дьокуускай куоракка баар “Руслан” маҕаһыына ахсынньы 12 күнүгэр уокка былдьана сыспыта, барыбытын аймаабыта.
Ханнык баҕарар ыарахан кэмҥэ өбүгэлэрбит муударай этиилэрэ күүс-көмө буолар. Ол курдук “ойуурдаах куобах охтубат” дииллэрин курдук Руслан Федотов бу уустук кэмигэр улууһун дьоно-сэргэтэ көмөҕө кэлэн, маҕаһыыҥҥа субуотунньуктаан, бэйэлэрин көмөлөрүн ким хайа кыалларынан оҥордулар. Бу буоллаҕа эбээт, үтүө үтүөнэн төлөнөрө диэн. Руслан Еремеевич бу кэмнэр тухары хаһан да ханнык да кэмҥэ көрдөрһүүлээх кэлбит дьоҥҥо көмөлөһө, ыллыктаах тылынан сүбэ-ама буолар.
“Дьонум-сэргэм алдьархай тахсаатын кытта тута, төлөпүөнүнэн тахсан уоскутар тыллары этэн, көмөҕө кэлэргэ бэлэмнэрин эппиттэрэ, миэхэ олус көмө буолбута. Баһаар кэнниттэн барытын чөлүгэр түһэрэр ыарахаттардаах. Умайбыт дьиэ бөҕө-саҕа, оҥоһуута туох аанньа буолуой. Ол эрэн, бу ыарахан кэммэр дьон туора турбата, чуолаан дойдум Аммам улууһун дьоно сүдү күүс-көмө буолбуттара сүргэбин ордук көтөхтө. Амма улууһун уонна нэһилиэктэрин баһылыктара, «Амма суол» ХЭУо сибээскэ тахсан, билсэн, бэйэлэрэ кэлэн көмөлөһөн абыраатылар. Онон дьоммор-сэргэбэр махталым муҥура суох. Ол курдук, ахсынньы 18 күнүттэн саҕалаан көмө бөҕө оҥоһулунна.
Ис сүрэхтэн долгуйан туран Амма улууһун улуус дьаһалтатыгар, Болугур, Абаҕа, Алтан, Чакыр, Соморсун, Чапчылҕан, Сулҕаччы, Сатаҕай, Эмис, Бөтүҥ, Мээндиги , Амма Наахара нэһилиэктэрин баһылыктарыгар, олохтоохторугар, Амма улууһун үөрэҕириитин салалтатыгар, оскуола дириэктэрдэригэр, «Амма Суол» ХЭУо дириэктэрдэригэр Константин Иннокентьевич Слепцовка уонна бэйэм үлэһиттэрбэр, уолаттарбар, техүлэһиттэрбэр сүдү махталбын биллэрэбин. Үлэ бөҕө үлэлэннэ. “Доҕор хайдаҕа алдьархай кэмигэр биллэр” диэн маны этэн эрдэхтэрэ. Аны Абаҕаттан “көмөлөһөр, үлэлиир дьоҥҥун аһатаргар” диэн убаһа аҥарын ыытан, соһутан да, үөрдэн да ыллылар. Бу көмөлөспүт дьоммор өссө төгүл махтанан туран, чөл, чэгиэн туругу, ситиһиини, үтүмэн-үгүс үөрүүнү, дьолу, тапталы баҕарабын. Үүнэр саҥа 2025 сыл хас биирдиигитигэр үтүөнү эрэ түстээтин. Дойдубут үрдүнэн ыраас халлаан, ил-эйэ эрэ сатыылаатын. Өссө төгүл махтал буоллун”, — диэн Руслан Еремеевич долгуйан туран санаатын тириэртэ.
“Амма олоҕо” хаһыат