Билигин хас биирдии киһи сарсыардата ватсаабы көрүүттэн саҕаланар диэтэххэ, омун буолбатах. Дойдуга, өрөспүүбүлүкэҕэ туох буола турарын интернеттэн тэттик сонуннартан ааҕан билэрбит олохпут чахчыта буолла. Оччоҕо кумааҕы хаһыаттар, сурунааллар туохха наадаларый диир ордук эдэр көлүөнэ дьон бааллар.
Хаһыакка, сурунаалга сурутуу кэмэ саҕаланна. Бүгүн, алтынньы 4 күнүттэн саҕалаан уон күн устата бары хаһыаттарга уонна сурунаалларга чэпчэтиилээх сурутуу ыытыллыаҕа. Манан сиэттэрэн саха тыллаах таһаарыылар туох суолталаахтарын өрөспүүбүлүкэ “Сахабэчээт” диэн бөдөҥ медиахампаанньа салайааччыта Ньургуйаана Стручковалын кэпсэтиини сэргии ааҕын.
» «Сахабэчээт» судаарыстыба автономиялаах тэрилтэтэ саха тылын харыстыыр, сахалыы тыллаах таһаарыылары – хаһыаттары, сурунааллары элбэтэр туһугар, ааҕыыны, өйү-санааны иитэр, тарҕатар туһугар туруулаһан үлэлиибит. Бэчээт эйгэтэ, хаһыаттары, сурунааллары бэчээттээн таһаарыы диэн – культура биир туспа араҥата буолар. Улуус хаһыаттара “Сахабэчээккэ” бааллар. Улуустарга барытыгар күн бүгүҥҥэ диэри сүрүн өйү-санааны, бэйэлэрин сирдэригэр-уоттарыгар буола турар сабыытыйалары, олохторун-дьаһахтарын, дьоннорун-сэргэлэрин тустарынан сонуннары, суруйуулары хаһыаты ааҕан билсэ, араас хайысхаларга гражданскай позицияларын тиэрдэ, санааларын үллэстэ олороллор. Холобур, Алдан оройуонун “Алдан рабочайа” хаһыата 1928 с. тэриллибитэ, аҕыйах сылынан үйэ буолуо. Улуус, өрөспүүбүлүкэ хаһыаттарыгар бүтүн көлүөнэлэр иитиллэн таҕыстахтара.
Дьон улуус, өрөспүүбүлүкэ хаһыаттарыгар, сурунаалларыгар наадыйар дуу, суох дуу диэн быйыл кыһын улахан социологическай чинчийии ыыттыбыт. Ол түмүгүнэн сүүс бырыһыан да буолбатар, хаһыакка, сурунаалга ордук аҕа саастаах көлүөнэ наадыйара билиннэ. Бэчээт бородууксуйаларыгар сурутуу суох буоллаҕына, ону кытта тэҥинэн тыл биир улахан эйгэтэ сүтэн хаалар куттала суоһуур. Тыл – тыыннаах, хамсыыр эйгэ. Оннооҕор аҕам саастаах киһи эрэ барыта тылы толору билэр, туттар буолбатах. Төһөнөн элбэх сахалыы таһаарыы баар да, соччонон төрөөбүт тыл туттуллар эйгэтин кэҥэтэр. Билигин аан дойду үрдүнэн киһи-аймах сүҥкэн улахан процесска сылдьар –сыыппараҕа көһөр быыһык кэмэ. Ити сүҥкэн хамсааһыҥҥа мэлиллэн урут илиибитигэр бэриллэр хамнаспыт, кумааҕы харчыбыт электроннай каартаҕа көспүтүн курдук, хаһыат суох буолар кэмэ хаһан эрэ эмиэ кэлиэҕэ. Ол быыһык кэм төһө кээмэйдээх буолара аан дойдуга бара турар хамсааһыннары кытта ситимнээх. Кумааҕы хаһыаттар симэлийэн сүтүүлэрин кытта тыл быһаччы ситимнээх буолан, тылбыт сүтүөн сөп. Онон кумааҕы хаһыаттары сүтэрии быһах биитинэн хаампыкка тэҥнээх, кутталлаах. Сыыппараҕа көһүү киһи-аймахха, ордук аҕыйах ахсааннаах дьоҕус норуоттарга охсуулааҕа чахчы. Билигин судаарыстыбабыт, өрөспүүбүлүкэбит үрдүкү салалтата, Ил Дархаммыт тылы харыстааһын политикатын ыытар буолан, тыл эйгэтин тутууга хаһыаттар, сурунааллар тахсаллар, ааҕааччыга тиийэллэр. Судаарыстыбаннай өйөбүл суох буоллаҕына, туга да суох хаалабыт», — диэн этэр Ньургуйаана Михайловна.
«Сахабэчээт» судаарыстыбаннай автономнай тэрилтэтин генеральнай дириэктэрин кытта сиһилии кэпсэтиини «Амма олоҕо» хаһыат кэлэр нүөмэригэр ааҕаарын. Манна кини «Чолбон» уонна «Полярная звезда», ону сэргэ иккис тыынын ылан тахсан эрэр «Байанай» сурунааллар тустарынан билиһиннэриэ, тоҕо хайаатар да сурутан ааҕыы суолталааҕын быһаарыа.
Кытаатын, чэпчэтиилээх сурутуу кэмин мүччү тутумаҥ, баар суох соҕотох улуускут хаһыатыгар уонна «Сахабэчээт» таһаарыыларыгар сурутуҥ!
«Амма олоҕо» хаһыат