Дьокуускай куоракка «Защитники Отечества» Фонда быйылгы сыллааҕы үлэ түмүктэрин таһаарар тэрээһинэ буолан ааста. Манна Амма улууһуттан Эмис нэһилиэгиттэн Николай уонна Маргарита Уваровтар, кыыстара Ньургуйаана Дьячковскаяны кытта кыттыыны ыллылар. Бу күн анал байыаннай дьайыыга Ийэ дойдуларын көмүскүү сылдьар саллааттар аҕаларыгар махтанан туран мэтээлэри туттардылар.
«Биһиги Фондабыт анал байыаннай дьайыыттан кэлбит, кэлэ сылдьар буойуннары, ону кытта кинилэр дьиэ кэргэннэрин кытта үлэлэһэр. Фонда ааспыт сылга тэриллэн бу быйыл түмүктэри таһаарда. Миэхэ бу кэм устата 167 буойун, кинилэр кэргэттэрэ араас кыһалҕалаах боппуруостарынан кэлэн бардылар. Ону барытын араас салааларынан арааран, ыйан-кэрдэн, сүбэлээн, быһааран биэрдим. Түмүктүүр тэрээһиҥҥэ анал байыаннай дьайыыга хорсуннук Ийэ дойдуларын көмүскүү сылдьар саллаат уолаттар аҕаларын бэлиэтээтилэр. Онно биһиги улуустан Эмис нэһилиэгиттэн Николай Васильевич Уваров ыҥырыллыбыта уонна Фонда салайааччыта Алексей Александровтан «Отец солдата» диэн мэтээли тутта.
Кинини кытта кэргэнэ уонна кыыһа сырыттылар. Кинилэр уоллара, бырааттара Василий байыаннай дьайыы саҕаланыаҕыттан бастаан волонтерунан саҕалаан, билигин инники кирбиигэ сылдьар хорсун саллаат буолар. Бу үрдүк билинии наҕараадатын уопсайа 11 аҕа тутта. Биһиги Уваровтар дьиэ кэргэни эҕэрдэлиибит уонна Василий этэҥҥэ кыайыы көтөллөөх кэлиэ диэн эрэнэбит»,-диэн Фонда Амма улууһугар социальный координатора Саргылана Константинова сырдатта.
«Амма олоҕо» хаһыат