Амма улууһун баһылыгын социальнай боппуруостарга солбуйааччыта Ньургуйаана Илларионова «Саҥа дьыл чахчы алыптаах бырааһынньык» диэн этэр. Ол курдук бу бырааһынньыкка оҕо аймах барыта үөрүүтэ-көтүүтэ үрдүүр, баҕа санаата туолар.
«Саҥа Дьыл дьикти, алыптаах түгэннэригэр олох итэҕэйэбин. Ол курдук, күн бүгүн улууспут 117 доруобуйатынан хааччаахтаах оҕолоругар биир дойдулаахпыт, урбаанньыт Олег Кондаков Дьокуускай куораттан кэлэн иһэр Саҥа Дьылынан, Ороһооспонон минньигэс бэлэхтэри утары уунна. Бэлэхтэри Амматааҕы биир кэлим социальнай управления салайааччыта Любовь Ивановна Дорофеева оҕолорго Ороһооспо күннэригэр бары нэһилиэктэринэн тиэрдиэхпит диэн эттэ. Маннык алыптаах түгэни бэлэхтиир биир дойдулаахпытыгар Олег Вениаминовичка ис сүрэхпититтэн махтанабыт уонна кэлэн иһэр Саҥа Дьылга бары үтүөнү уонна кэрэни, үрдүк ситиһиилэри баҕарабыт. Оҕолор барахсаттар үөрүүлэрэ үтүөнэн эрэ түгэннэри аҕаллын»,- диэн Ньургуйаана Ивановна сырдатта.
«Амма олоҕо» хаһыат