Бу күннэргэ Санкт Петербург куоракка ыытыллыбыт Бүтүн Арассыыйатааҕы «Мемориал чемпиона СССР В.А.Сокова» дуобат күрэҕэр Амма улууһуттан уопсайа 18 — Бөтүҥтэн алта, Эмистэн икки, Амматтан сэттэ, Өнньүөстэн үс дуобатчыт кыттыннылар.
Бу күрэххэ Валерий Гаврильев Амма Наахараттан үс иитиллээччитин илдьэ сылдьар. Барыбыт үөрүүтүгэр Амма Наахара орто оскуолатын 8-с кылааһын бастыҥ үөрэнээччитэ Дима Ефремов 3 миэстэ буолары ситистэ. Дима дуобатынан кыра эрдэҕиттэн бастыҥ тренергэ Валерий Иванович Гаврильевка дьарыктанар.
Дуобат абылаҥнаах хонуутун тэҥэ Дима Ефремов араас олимпиадаларга, күрэхтэргэ оскуолатын аатын элбэхтик көмүскүүр. Кини дуобакка маастарга кандидат. Тренерэ Валерий Иванович дуобат дьарыгар иитиллээччилэригэр араас хаамыылары, албастары өрүү көрдөрөн үөрэтэр, дьиэҕэ үлэ биэрэр.
Кинини кытары аҕыйах хонуктааҕыта Саха өрөспүүбүлүкэтигэр ыытыллыбыт разряд толоруутун күрэҕин кыайыылааҕа, 2-м спортивнай нуорманы толорбут 4-с кылаас бастыҥ үөрэнээччитэ Аэлита Александрова уонна 7-с кылаас үөрэнээччитэ, үгүс дуобат күрэҕин призера, дуобакка маастарга кандидат Сайаана Макарова кытыннылар.
Бу күрэххэ Арассыыйа 26-та регионуттан, Казахстантан үгүс дуобатчыт баар. Аммалары үс тренер, биир ийэ арыаллыы сылдьар. Саха сиригэр бу күрэхтэн Аммаҕа, Дьокуускайга, Чурапчыга, Хаҥаласка түөрт мэтээл баар буолла, сыралаах үлэ ситиһиилэрин көрдөрөр.
Амма Наахара, Амма улууһа киэн туттар тренербытыгар Валерий Ивановичка, оҕолорго, төрөппүттэргэ эҕэрдэлэр элээрэллэр. Уһуйааччыга ситиһиини, тулууру, талааннаах оҕолору, онтон дьарыктанар оҕолорбутугар ситиһии үгүс үлэттэн, бириэмэни сөпкө аттарыыттан кэлэрин сыаналыы үөрэнэргитигэр баҕарабыт. Инники олоххутугар дуобат хонуутунан хаамаргыт курдук өрүү толкуйдаан инники хардыылаан, ситиһии сиэтиилээх үтүө дьон буола үүнүн диэн алгыспытын ыытабыт.
Ирина Корякина – Олесова.