Сахабыт сирин маҥнайгы Бэрэсидьиэнэ Михаил Николаев көҕүлээбит » Рисуем все» диэн бырайыак эстафетатын Амма 2№ -дээх оскулатыттан туппуппут. Оҕону кэрэҕэ уһуйар бырайыак чэрчитинэн уһуйааммытыгар бөлөхтөр икки ардыларыгар уруһуй күрэһэ, быыстапка, аһаҕас дьарыктар, дьиэ кэргэнинээн уруһуй, маастар- кылаастар буолан аастылар.
Эстафета бэлиэтин ылаат, уһуйааммытыгар иитиллээччилэр уруһуйдарын быыстапкатын тэрийдибит, ону таһынан араас хабааннаах маастар- кылаастар буоллулар. «Мин олоҥхо дойдутун оҕотобун» диэн бырайыакпытынан истиэнэҕэ уруһуйбут силигин ситэн бэрт сэргэх күннэр буолан аастылар. Даҕатан эттэххэ уһуйааммытыгар араас талба талааннаах үлэһиттэр бааллар. Ол курдук Анастасия Ефремова өрүс таастарыгар уруһуй түһэрэн, Наталья Кононова граттаж техниканан, Александра Артемьева уонна «Кээһэх оһуор» диэн удьуор ситимин түстүүр Тамара Иванова уруһуйун оҥортороннор бэртээхэй маастар- кылаастарыгар сөбүлээн дьарыктанныбыт.
Эстафетаны салгыырга анаан бырайыак бэлиэтин Амма нэһилиэгин “Хатыҥчаана” уһуйааҥҥа үөрүүлээх быһыыга-майгыга туттардыбыт. Уһуйааммыт үлэһиттэрэ ыалдьыттары хомус доҕуһуоллаах ырыанан, саха үҥкүүтүнэн, оһуохайынан көрүстүбүт.
Граттаж техниканан олоҥхоттон быһа тардан маастар кылаас көрдөрөн, уруһуйдатан өйдөбүнньүк хаалар гына илии тутуурдаах, сэҥээрэн үөрэн-көтөн тарҕастылар. «Рисуем все» бырайыак өссө да сайдан, саҥа талааннар арыллан, Амма атын ааттата турдуннар диэн баҕа санаабытын тиэрдэбит.
Евдокия ЗАХАРОВА