Сатаҕайдааҕы «Айыллык» норуот айымньытын дьиэтигэр олохтоох дьаһалта көҕүлээһининэн, кэлэр 2025 сылга олохтоох көҕүлээһини өйүүр бырагырааманан киирбит бырайыактары талыыга нэһилиэк уопсай мунньаҕа буолла. Олохтоохтор кэлэн көхтөөхтүк кыттан, ханнык бырайыакка санааларын ууралларын эттилэр.
Мунньаҕы Сатаҕай нэһилиэгин баһылыга Алексей Шишигин иилээн-саҕалаан ыытта. Кини олохтоох көҕүлээһини өйүүр бырагыраама, ону тэҥэ эрдэ олохтоох дьаһалта исписэлиистэрэ бэлэмнээн ыыталаабыт ыйытыктарын түмүгүн иһитиннэрдэ. Мунньах кыттыылаахтара туруорсар бырайыактарын тула аһаҕас кэпсэтиигэ кыттан, санаа атастаһыытыгар көхтөөхтүк кытыннылар. Тыл этиитигэр кыттыбыт дьон санаалара улаханнык хайдыбакка Ийэ скверин тутууну сөптөөҕүнэн сыаналаатылар, ыытыллыбыт ыйытык да түмүгүнэн инники күөҥҥэ тахсыбытын бэлиэтээтилэр. Ол курдук бастакы бырайыак Ийэ скверин тутуу 85, иккис бырайыак — ыһыахтыыр түһүлгэни ситэрэн –хоторон, саҥардан биэрии 15, үсүһүнэн нэһилиэккэ киирии суолга бэлиэ туруоруутугар ыйытыыга кыттыбыт олохтоохтор 5 бырыһыаннара сөпсөспүттэр.
Онон баһыйар куолаһы ылан бастакы бырайыак талылыллынна. Мунньахха барыта 72 киһи кэлбититтэн бастакы бырайыакка бары 100% куоластаатыбыт, утарааччы суох буолла. Нэһилиэк дьокутааттарын сэбиэтин бэрэссэдээтэлэ Иосиф Никитин дьон көхтөөхтүк кэлэн кыттыбытыгар махтанна, нэһилиэк инники сайдыыта кэскиллээҕин бэлиэтээтэ.
Бу курдук Сатаҕай нэһилиэгин олохтоохторо «ППМИ — 2025» бырайыак конкурсугар бары биир киһи курдук көхтөөхтүк кыттан, бэйэлэрин санааларын этэн, нэһилиэк сайдыытыгар кылааттарын киллэрсэргэ бэлэмнэрин биллэрэн, үөрэн-көтөн тарҕастылар.
Христина СКРЯБИНА