Д.Г. Готоцева аатынан Сатаҕайдааҕы ОСК тэриллибитэ 60 сылын бэлиэтиир дьоро күнэ буолан ааста. Ыраахтан-чугастан ыалдьыттар кэлэн эҕэрдэ эриэккэһин этэн, бэлэхтэрин туттаран бардылар.
Сэбиэдиссэй Елена Скрябина уһуйаан тэриллибит историятын саас сааһынан олус үчүгэйдик сырдатта. Сатаҕай кырачааннарын кэрэҕэ уһуйар, элбэххэ үөрэтэр тэрилтэ улууска эрэ буолбакка, өрөспүүбүлүкэҕэ кытта биир бастыҥнара буолар. Ол курдук уһуйаан 1996 сылга биир бастакынан Бүтүн Арассыыйатааҕы «Сыл бастыҥ уһуйаана» ааты ылбыта туоһулуур, Ол кэннэ араас таһымнаах күрэхтэргэ, көрүүлэргэ кыттан лауреат, кыайыылаах буолбуттарын ааҕан сиппэккин. Үлэһит кэлэктиибит үбүлүөйдэринэн Амма улууһун социальнай боппуруостарга баһылыгы солбуйааччы Ньургуйаана Илларионова, үөрэх салалтатын начальнига Нколай Ларионов, Сатаҕай нэһилиэгин баһылыга Алексей Шишигин, нэһилиэк тэрилтэлэрин салайааччылара истиҥ-иһирэх тыллары эттилэр, үлэ дьонун, кэлэктиип бэтэрээннэрин чиэстээн сэмэй бэлэхтэрин, махтал суруктарын туттардылар.
Үбүлүөйгэ кэлбит бэтэрээннэр, Сатаҕай нэһилиэгин тэрилтэлэрин салайааччылара, ыҥырыылаах ыалдьыттар иитээччилэр тэрийбит методическай, историяны сырдатар быыстапканы сэҥээрэ көрдүлэр, уруккуну санаан санааларын атастастылар. Маанылаах сандалы тула араас эҕэрдэлэр, баҕа санаа бастыҥа ананна, ыллам ырыа да ылланна. Уһуйаан улууска «Оҕо уонна театр» диэн бырайыагынан сыл ахсын көрүү-күрэҕи тэрийэн ыытарын бэлиэтээн Макаровтар дьиэ кэргэн уһуйааҥҥа бэйэ оҥоһуга мааскалары бэлэх уунан иитээччилэри үөртүлэр. Үбүлүөйдээх дьоро күнү Сатаҕайдар бэйэлэрин кыыстара, билигин Чурапчы улууһугар олорор-үлэлиир, түөрт оҕо амарах ийэтэ Варвара Орлова кыайа-хото тутан ыытта. Елена Петровнаҕа, Анна Васильевнаҕа үбүлүөйдээх тэрээһини үрдүк таһымнаахтык тэрийэн ыыппыттарыгар махтал! Үлэҕит таһаарыылаах буоллун, төрөппүттэргит махталларынан кынаттанан өссө да саҥаны айыҥ-тутуҥ, ситиһиилэр кэлэ турдуннар.
Эмма ДАВЫДОВА