Е.А. Шишигин аатынан Сатаҕай орто оскуолатыгар информатика учууталынан эдэр учуутал Ньургун Давыдов ситиһиилээхтик үлэлиир. Ньургун Павлович үөрэх таһынан эбии дьарыкка үөрэнээччилэрин кытта утумнаахтык дьарыктанар. Ону таһынан өрөспүбүлүкэҕэ ыытыллар бырайыактарга кытталлар. Биир оннук бырайыагынан “DriveeIT” диэн бырайыак буолар. Дьэ бу туох бырайыак буоларый?
Бу бырайыак Drivee уонна ХИФУ математика уонна информатика институтун көҕүлээһиннэринэн ыыттыллар. Кини сыалынан тыа сирин оскуолаларыттан айти уонна саҥа технологиялар эйгэлэригэр дьоҕурдаах оҕолору булуу уонна кинилэргэ улахан интэриэһи үөскэтии буолар. Биһиги оскуолабытыттан бырайыакка 10 кылаас үөрэнээччитэ Васильев Ярослав уонна 9-с кылаас үөрэнээччилэрэ Окорокова Анна, Онуфриева Инна кытыннылар. Бырайыак 2023 сыл алтынньы ыйыттан саҕаланан, өрөспүүбүлүкэ араас оройуоннарыттан кыттыыны ыллылар. Оҕолор сыһыарыллыбыт наставниктарын, экспертэрин уонна тимлидтарын кытта бэйэлэрин бырайыактарын үлэлэттилэр уонна курс бүтүүтүгэр көмүскээтилэр. Оҕолор бу курстан элбэххэ үөрэннилэр, бэйэлэригэр элбэх туһалааҕы ыллылар.
“Биһиги Амма улууһуттан Чакыр оскуолатын оҕолорун кытта кытынныбыт. Барыта уонтан тахса хамаандаҕа арахсан үөрэннибит. Онно биһигини программированиеҕа, профессиональнай программалары туттарга үөрэппиттэрэ уонна араас лиэксийэлэри иһиттибит. Кыһын, саҥа дьыл кэнниттэн, 3 күннээх интенсивка баран кэлбиппит. Барыбытын уопсайга олохтообуттара. Онно икки күн хоммуппут, хосторго араарбыттара. Хата мин сэтинньи ыйтан бырайыакка киирбит сорох оҕолору кытта билсибит, табаарыстаспыт буоламмын, доҕотторбун көрсөн үөрбүтүм. Кэлбит күммүтүгэр киэһэ лекция кэнниттэн, оҕолору кытта көрсүһүү, билсиһии, санаа атастаһыыта буолбута. Иккис күммүтүгэр АйТи идэлэрин кытта сибээстээх үөрэхтэргэ сүрүн болҕомтону уурбуттара. «Сбер-21» оскуолаҕа уонна «Синергия» диэн цифровой колледжка экскурсияҕа сылдьыбыппыт. Ол кэннэ «Знакомство с Python и основы программирования», «Анимация движения мяча», «2D анимация», «Универсальные знания дизайнера» уонна «Как сделать свое выступление интересным» диэн маастар-кылаастарга сылдьыбыппыт. Араас оонньуулар, мероприятиялар буолбуттара.
Биһиги хамаандабыт уонча киһиттэн састааптаах этэ, бүтэһиккэ биһиги үһүөн эрэ хаалбыппыт, Онуфриева Инна, Окорокова Анна уонна мин буолан. Хас биирдии хамаандалар тимлидтаахтар, тимлидтар устудьуоннар этилэр. Биһиги тимлидпыт Федоров Дьулуур буолбута. Кинини кытта хас нэдиэлэ бүтүүтүн аайы тугу гынарбытын былаанныыбыт, тугу оҥорбуппутун көрдөрөр, быһаарсар этибит. Түмүктүүр күммүтүгэр 10 хамаанда бырайыактарбытын Drivee офиһыгар көмүскээбиппит. Экспертэр элбэх сүбэни биэрэллэр, хардарыта кэпсэтии буолбута, элбэх хоруйга эппиэти ыллыбыт. Онон үчүгэй, интэриэһинэй бырайыак буолан ааста”, — диэн хамаанда чилиэнэ, бырайыак кыттыылааҕа Ярослав Васильев кэпсээтэ.
Христина СКРЯБИНА