Сатаҕайга Социалистическай Үлэ Геройа Т.С.Лукин төрөөбүтэ 110 сылыгар анаммыт үбүлүөйдээх ыһыах чэрчитинэн иистэнньэҥ, модельер, СӨ норуотун маастара Евдокия Давыдова төрөөбүтэ 50 сылыгар, Арассыыйаҕа Дьиэ кэргэн сылыгар аналлаах “Саха маанылаах таҥаһа” күрэх ыытыллынна. Сахалыы симэммит дьиэ кэргэттэр араас дьэрэкээн, талба таҥастары ыһыах ыалдьыттарыгар, олохтоохторго көрдөрдүлэр, сөхтөрдүлэр.
Талба талааннаах иистэнньэҥ Евдокия Даниловна Давыдова айан таһаарбыт таҥастарын улууска эрэ буолбакка, бүтүн өрөспүүбүлүкэ үрдүнэн киэҥник билэллэр. Кини бэйэтэ “Елена” диэн таҥас сыаҕын арыйан төһөлөөх таҥаһы үҥкүүһүттэргэ, ырыаһыттарга тикпитэ буолуой. Евдокия Даниловна тикпит таҥаһа олус кыраһыабайынан, уратытынан тута биллэрэ. Кини сырдык аатын кэриэстээн, төрөөбүтэ 50 сылыгар анаан дьиэ кэргэнинэн сахалыы таҥаһы көрүү үбүлүөйдээх ыһыахха сөп түбэһиннэрэн ыытылынна. Күрэҕи олохтоох “Айыллык” култуура киинэ, бибилэтиэкэ, ону сэргэ Давыдовтар дьиэ кэргэннэрэ тэрийэн ыыттылар.
“Күрэхпитин улуус таһымнаах ыытан, эрдэттэн балаһыанньа оҥорон ыыталаабыппыт. Балаһыанньа быһыытынан кыттааччы дьүүллүүр сүбэ кытааччылар тиктибит таҥастарын тигиитин, өҥнөрө-дьүһүннэрэ төһө дьүөрэлэһэрин, тупсаҕайын көрдүбүт. Күрэх үс түһүмэҕинэн барда. Кытааччы бу түһүмэхтэргэ бииригэр эрэ кыттыан эмиэ сөп. Ол курдук бастатан туран төрүт үгэскэ олоҕуран тигиллибит таҥас, иккиһинэн күннээҕи таҥаска сахалыы тыыны киллэрии уонна үһүс түһүмэҕинэн сценаҕа кэтиллэр таҥас. Ону көрдөрөллөрүгэр кыттааччылар хоһоон ааҕан, ыллаан, эбэтэр үҥкүүлээн көрдөрүөхтэрин сөп. Күрэххэ уопсайа 8 дьиэ кэргэн кытынна. Бөтүҥтэн Борисовтар, Алтантан Дьячковскайдар, Эмистэн Тимофеевтар, Чапчылҕантан Шишигиннар, ыалыы сытар Бүтэйдээх нэһилиэгиттэн Стручковтар, Сатаҕайтан Орловтар уонна Поповтар дьиэ кэргэттэрэ кытыннылар. Кытааччылар бары олус сэргэхтэр. Күрэх түмүгүнэн кылаан бирииһи Алтантан Анастасия Дьячковская дьиэ кэргэнэ ылан Елена Давыдова оҕолоро, бииргэ төрөөбүттэрэ олохтообут 50 000 солк. уу харчы хаһаайыннарынан буоллулар.
Онтон 1-кы үрдэли Сатаҕайтан Поповтар дьиэ кэргэн, 2-с үрдэли Сатаҕайтан Орловтар, 3-с үрдэли Чапчылҕантан Шишигиннэр, биһирэбил бирииһи Бөтүҥтэн Борисовтар дьиэ кэргэн ыллылар. Дьүүллүүр сүбэҕэ Амматааҕы Ф. Потапов аатынан норуот айымньытын дьиэтин фонданы кытта үлэ исписэлииһэ, СӨ култууратын туйгуна Дария Ивановна Иванова, Сатаҕайтан үлэ бэтэрээнэ, нэһилиэк бочуоттаах олохтооҕо, иистэнньэҥ, Герой Ийэ Февронья Федотовна үлэлээтилэр. Күрэххэ кыттыбыт дьиэ кэргэттэр бары харчынан уонна сыаналаах бирииһинэн наҕараадаланнылар”, — диэн олохтоох бибилэтиэкэр, СӨ култууратын үтүөлээх үлэһитэ Анна Андреева сырдатта.
“Амма олоҕо” хаһыат