Сатаҕайга Ороһуоспатааҕы көрсүһүүгэ ыаллыы сытар түөрт нэһилиэктэртэн аҕам саастаах уонна 35 -51-гэр диэри саастаах дьон көрсөн олус истиҥ, үчүгэй дьоро киэһэни атаардылар.
Сатаҕайдааҕы «Айыллык” норуот айымньытын дьиэтигэр нэһилиэк олохтоохторугар, ыалдьыттарыгар Саргылаах Саҥа дьылынан эҕэрдэлээн, «Ороһуоспатааҕы көлүөнэнэн көрсүһүү» диэн бырааһынньыктааҕы улахан ырыа-тойук, көр-нар дьоро киэһэтэ тэрилиннэ. Бу күн ыаллыы сытар Алтан, Эмис уонна Мэҥэ Хаҥалас улууһун Бүтэйдээх нэһиэлэктэриттэн ыалдьыттарбыт бэркэ тэринэн кэлэн сэргэх тэрээһини киэргэттилэр.
“Бу көрсүһүүнү “Айыллык” норуот айымньытын дьиэтин кэлэктиибэ көҕүлээн ыытта. Көрсүһүү сыалынан нэһилиэктэр икки ардыларыгар доҕордуу сыһыаны олохтооһун, түмсүүлээх буолууну ситиһии уонна көлүөнэлэр айар дьоҕурдарын, талааннарын кытары билсиһии. Ол курдук үстүү концертнай нүөмэргэ, маскарадка, араас көрдөөх оонньууларга кыттаннар дуоһуйа сынньаннылар. Түмүккэ культура дьиэтин дириэктэрэ Екатерина Ивановна Аммосова бу маннык көрсүһүүнү бырайыак оҥорон сыл аайы ыытарга ыҥырыытын, нэһилиэк дэлэгээссийэтин салайааччылара биһирээбиттэрин биллэрдилэр. Биэчэр 70 -80 сыллар музыкаларынан уруккулуу үҥкүү киэһэтэ хойукка диэри ньиргийдэ”, — диэн Сатаҕайдааҕы кырдьаҕастар сэбиэттэрин бэрэссэдээтэлэ Анна Андреева үөрүүтүн үллэстэр.
Бүтэйдээх нэһилиэгин дэлэгээссийэтин салайан кэлбит сынньалаҥ киинин үлэһитэ Марина Давыдова: “Олус көхтөөх тэрээһинтэн үөрэбин. Үчүгэйдик бэлэмнэнэн кэлиэххэ баар эбит диэн санааҕа кэллим. Бу бырайыак идеята олус үчүгэй, тохтообокко салҕанан бара турара буоллар, эһиил Эмискэ тэринэн тиийиэхпит. Буолар бириэмэтэ үчүгэй, табыгастаах күҥҥэ тэриллибит.” диэн этэр.
Алтан нэһилиэгин пенсионердарын түмсүүтүн салайааччыта Марина Лыткина: “Үһүс сылбын түмсүүнү салайа сылдьабын. Бу кэмнэргэ тэрээһин бөҕөбүт. Бүгүн күҥҥэ түмсүүм дьоно бэйэбин сынньата аҕаллылар. Дьонум олус сэргэхтэр. Бэлэм массыынаҕа тиэллэн эрэ кэллим. Кэлбиппиттэн астынабын, олус үчүгэй тэрээһинтэн үөрэбит. Бу курдук эһиилги дьылга кыайыылаах Эмис нэһилиэгэ салгыы ыытар буолбута үөрүүлээх.” диир.
Нэһилиэктэр араас көрдөөх ооньуулары бэлэмнээн аҕалбыттар. Манна араас таабырынтан саҕалаан көрдөөх оонньуулар сэргэхтик буоллулар. Кыайыылаахтар бириис тутан сүргэлэрэ көтөҕүллүннэ. Ытык-мааны ыалдьыттарбыт кэрэ саас кэрэ кэмнэрин, дьикти саас сырдык иэйиилэрин эргитэн хойукка диэри үҥкүү-битии буоллулар. Күндү дьоммутугар баҕа санаа бастыҥын, үтүө санаа үтүмэнин, чэгиэн-чэбдик кытаанах доруобуйаны баҕарабыт.
Христина СКРЯБИНА.