Сатаҕай нэһилиэгэр Аҕам саастаахтар декадаларын чэрчитинэн араас сэргэх тэрээһиннэр буола тураллар. Ол курдук олохтоох бибилэтиэкэ тэрийиитинэн оскуола үөрэнээччилэригэр “Мин эбэм аптаах холбуката” диэн кыргыттарга аналлаах көрүү быыстапката, библиоволонтердар бэтэрээннэргэ дьиэлэринэн сылдьан эҕэрдэлэрэ, мобильнай грамотаҕа үөрэтии дьарыктар, чэгиэн чэбдик буолуу күнүгэр — бэйэни массажтаныыга уонна үҥкүүнэн үөрэхтэр буоллулар. Фельдшер дьиэҕэ сытар пенсионердары кэрийэн көрдө уонна бу күннэргэ “Сахалыы киинэни көрөн сынньаныах” диэн тэрээһиннэр буолаары тураллар.
Кырдьаҕастар сүбэлэрин бэрэссэдээтэлинэн өр кэмҥэ Ирина Михайловна Адамова үлэлээбитэ. Кини аҕам саастаах дьоммут олохторо-дьаһахтара тупсарыгар, бэйэлэрин сайыннарар көхтөөх өрүттэрэ сайдарыгар болҕомтотун ууран үлэлээбитэ уонна элбэх киһи махталын ылбыта. 2022 сылтан бэрэссэдээтэли солбуйааччынан Социалистическай Үлэ Геройа Т.С. Лукин аатынан модельнай бибилэтиэкэ — музей үлэһитэ Анна Ксенофонтовна Андреева талыллан үлэлиир.
“Сатаҕай нэһилиэгэр 126 пенсионер олорор, ол иһигэр 65 саастарыттан үөһэ 84 аҕам саастаах пенсионердар буолаллар, бүгүҥҥү кэмҥэ 52 пенсионер үлэ үөһүгэр сылдьаллар. Икки үлэ тыыл бэтэрээннэрэ бааллар. Биир интернационалист буойун олорор. Быйыл үлэ тыыл бэтэрээнэ Семен Семенович Яковлев 90 сааһын туолан “Ытык аҕа” диэн бочуоттаах ааты ылбыта уонна Амма улууһун бочуоттаах олохтооҕо буолбута. Тыыл уонна педагогическай үлэ бэтэрээнэ Василий Максимович Михайлов, култуура үлэтин бэтэрээнэ, сэрии сылын оҕото ССРС киномотографиятын туйгуна Иван Иванович Артемьев “Саха Республикатын ытык кырдьаҕаһа” диэн анал бэлиэнэн наҕараадаламмыттара. Герой ийэ Февронья Федотовна Никитина уонна мин Андреева Анна Ксенофонтовна Саха Өрөспүүбүлүкэтин бочуоттаах бэтэрээнэ диэн анал бэлиэнэн бэлиэтэннибит. Сыл устата бибилэтиэкэ иһинэн кырдьаҕастарга “Утум” диэн үһүс оскуола сылы быһа араас дьарыктары ыытар. Ол курдук олбох тигиитигэр Февронья Федотовна волонтерунан үлэлээтэ. Ону сэргэ эдэр волонтердар Раиса Егорова мобильнай грамотностка, Валентина Пахомова сиэлинэн хатыыга, Ньургустаана Охлопкова туостан тигиигэ үөрэхтэри, маастар-кылаастары ыытан кэллилэр. Олоҥхо ыһыаҕын көрсө нэһилиэккэ 214 олбох тигиитигэр 58 пенсионер кыттыыны ылла, ситии киэргэлин хатыытыгар, туостан тигиигэ эмиэ кыттыбыттара. Ыһыах тэрээһинигэр кыайан кыттыбатах пенсионердар 16500 солкуобай харчынан бэйэлэрин көмөлөрүн биллэрбиттэрэ. Быйыл кулун тутар 28 күнүгэр сылын аайы ыытыллар ыаллыы нэһилиэктэр спартакиадалара Мэҥэ Хаҥалас улууһун Бүтэйдээх нэһилиэгэр буолбута. Бу күрэххэ 24 бэтэрээн спортсменнар кыттыбыттара. Өрөспүүбүлүкэҕэ ыытыллыбыт “Ветеранское подворье” күрэххэ кыттан Дария Захаровна уонна Егор Ксенофонтович Андреевтар туоһу суругунан бэлиэтэннилэр. Дойду үрдүнэн буола турар балаһыанньаны өйдөөн биһиги пенсионердарбыт туора турбаттар. Икки төгүл анал байыаннай дьайыыга 46850 харчы хомуллан туттарыллыбыта”, — диэн Анна Ксенофонтовна туох үлэ барбытын сиһилии сырдатар.
Биһиги нэһилиэкпит ытык кырдьаҕастарынан киэн туттабыт уонна кинилэр мындыр толкуйдарынан чугас дьоннорун тапталларыгар, өйөбүллэригэр бигэнэн сирдээҕи олох кэрэтин туойса сылдьалларыттан үөрэбит. Кинилэр бэйэлэрин холобурдарынан олорор олохторо, билиилэрэ-көрүүлэрэ ыччаты күүстээх санааҕа, дойдуга бэриниилээх буолууга, олоҕу таптыырга угуйаллар, үөрэтэллэр. Бүгүн сынньалаҥ киинигэр“Эдэр сааһы эргитиэх “ биэчэр буолла. Бу күн тэрилтэлэр салайааччылара сыл үбүлүөйдээх күннээхтэрин бэлэҕинэн маанылаан соһуттулар. Үөрүүлээх күҥҥэ кэлбит ыалдьыттары остуол хотойорунан ас амтаннааҕа үөртэ, байаанынан ырыа,үҥкүү эрчимнээх эдэр сааһы санатан уйулҕаны долгутта. Бырааһынньыкка мустубут ытык дьоммут сүргэлэрэ көтөҕүллэн үҥкүүлээн да ыллылар, ыарыаны-тойугу даҕаны көҕүлүттэн туттулар.
Куруутун буоларын курдук “Айыллык” норуот айымньытын дьиэтин үлэһиттэрэ тэрээһини кыайа-хото туттулар. Араас сэргэх оонньуулары толкуйдаан дьону-сэргэни күллэрдилэр, аҕа көлүөнэ дьоҥҥо болҕомтолорун, кыһамньыларын ууран бырааһынньыгы бэрт сэргэхтик тэрийдилэр уонна дьон-сэргэ махталларын ыллылар.
Христина СКРЯБИНА