СӨ ИДьМ Амматааҕы отделениетыгар 2023 сыл отчуотун уопсастыбаннай Сэбиэт чилиэннэригэр, улуус борокуруоругар билиһиннэрдилэр. Мунньахха кыттыыны улуус баһылыгын социальнай боппуруостарга солбуйааччы Нюргуяна Илларионова ылла. Ааспыт сыллааҕы үлэ куһаҕана суох түмүктээх эрээри, сэрэтэр үлэ өссө ситэтэ суоҕа бэлиэтэннэ.
Отчуоттуур мунньаҕы начальник, полиция полковнига Василий Стрекаловскай салайан ыытта. Ааспыт үлэ түмүктэрин ис сулууспа майора Антонина Устинова иһитиннэрдэ. Дакылаакка этиллэринэн улууска ааспыт сылга буруйу оҥоруу уопсай ахсаана намтаабыт эрээри, ыарахан буруйу оҥоруу син биир үрдүк. Начальник бэлиэтииринэн ыарахан буруйу оҥоруу сыл устата тахсыбакка гынан баран, сыл бүтэһик ыйдарыгар бэлиэтэммит. Амма улууһа 2023 сыл түмүгүнэн өрөспүүбүлүкэ 34 улууһуттан 11-с миэстэҕэ турар. Маны сэргэ уопсастыбаннай ыйытык түмүгэр Амма улууһун полициятын сотрудниктарыгар итэҕэл эмиэ өрөспүүбүлүкэҕэ үрдүк таһымҥа турар. Бу куһаҕана суох көрдөрүү диэн этилиннэ. Салгыы начальнигы солбуйааччы, полиция майора Николай Турантаев ыытыллыбыт үлэни билиһиннэрдэ. Кини чахчы уопсай буруйу оҥоруу аччаабытын, ол гынан баран ыарахан буруйу оҥоруу улааппытын, буруйу арыйыы бырыһыана аччаабытын эттэ. Сэрэтэр үлэни күүһүрдэргэ, уопсастыбынньыктары кытта бииргэ рейдэлэр барыахтарын наадатын, инникитин сэрэтэр үлэни күүһүрдэргэ эттэ. Улуус борокуруора Михаил Николаев ааспыт сыл түмүктэрин билиһиннэрэн туран, ис дьыала отделын үлэтин ортонон сыаналаата уонна ыар буруй ахсаана элбээбитин итэҕэс быһыытынан бэлиэтээтэ. Маны сэргэ дьону төлөпүөнүнэн түөкүннээһин элбээбитинэн маны арыйарга күүһү уурарга ыҥырда. Баһылыгы социальнай боппуруостарга солбуйааччы Нюргуяна Илларионова чахчы сэрэтэр үлэ мөлтөөбүтүн, манна үлэ ситэтэ суох барбытын билинэрин биллэрдэ. Ол курдук уопсастыбаннай бэрээдэги көрүүгэ күүс-көмө буолар ДНД этэрээттэрэ сорох нэһилиэктэргэ өссө да тэриллэ иликтэрин, баар да буоллахтарына уота-күөһэ суох үлэлииллэр диэн эттэ. Ааспыт сылга бу үлэҕэ Гран ылан 800-тэн тахса тыһыынча солкуобай көрүллүбүтүн, быйыл эмиэ кыттыбыттарын эттэ. Инникитин итэҕэстэри туоратан үлэни күүһүрдэргэ, бары уопсастыбаннай тэрилтэлэр биир ситимнээхтик үлэлиэхтэрэ диэн бэлиэтээтэ. СӨ ИДьМ Амматааҕы отделениетын иһинэн уопсастыбаннай Сэбиэт бэрэссэдээтэлэ Николай Гоголев эмиэ болҕомтону сэрэтэр үлэҕэ уурарга, учаастактааҕы боломуочунайдар үлэлиир усулуобуйаларын тэрийэргэ улуус дьаһалтата болҕомтотун уурарыгар ыҥырда. “Нэһилиэнньэ барыта туруннаҕына эрэ, буруйу оҥоруу аччыаҕа. Соҕотох полиция сотрудниктара эрэ бэрээдэги тупсарбаттар” диэн кини санаатын тириэртэ.
Кэпсэтиигэ маны сэргэ уопсастыбаннай Сэбиэт чилиэннэрэ Степан Бурнашов, Павел Алексеев, Амма нэһилиэгин дьаһалтатын уопсастыбаннай үлэҕэ исписэлииһэ Екатерина Нестерева, полиция сотрудниктара Никита Дьячковскай, Максим Максимов кытыннылар, этиилэрин киллэрдилэр. Отчуоттуур мунньах түмүгүнэн үүммүт сылга сэрэтэр үлэни күүһүрдэргэ, көрдөрөр-иһитиннэрэр средстволары кытта бииргэ үлэлииргэ, ДНД-лар үлэлэрин болҕомтоҕо ыларга этилиннэ.
Көрсүһүүгэ ис дьыала отделын бэтэрээнэ Афанасий Афанасьев бэйэтэ олохтуур “Бастыҥ спортсмен” бирииһин 2023 сыл түмүгүнэн Айаал Ивановка туттарда. Айаал ааспыт сылга спорка үрдүк ситиһиилэри көрдөрөн отделын, улууһун чиэһин элбэхтэ көмүскээбит. Маны сэргэ өр сыл силиэстийэлиир отделга үлэлээбит, билигин кадровай үлэҕэ күүск-көмө буолар полиция подполковнигар Матрена Увароваҕа силиэстийэлиир уорганнара тэриллибиттэрэ 60 сылын үбүлүөйдээх бэлиэтин дохсун ытыс тыаһын ортототугар туттардылар.
Ис дьыала отделын ааспыт сыллааҕы үлэтин түмүктэрин туһунан сиһилии хаһыакка ааҕаарын.
“Амма олоҕо” хаһыат