Сэргэ Бэс оскуолатыгар Аҕа күнүн тэрээһиннэрэ сыллата киэҥник бэлиэтэнэр. Аҕа оҕотунаан спортивнай куоталаһыылара, төгүрүк остуол, хаартыска, видеоролик күрэхтэрэ олус интэриэһинэйдик тэриллэллэр.
Быйыл эмиэ видеоролик устан аҕаларбытын эҕэрдэлээтибит, нэдиэлэ устата аҕаларбыт кылаас чааһа ыыттылар. Семен Абрамов, Алексей Борисов, Степан Сутаков, Александр Христофоров, Ариан Заборовскай идэлэрин, иллэҥ кэмнэригэр дьарыктарын туһунан кэпсээтилэр.
Ол курдук, Алексей Борисов 1 уонна 4 кылаас оҕолоругар идэтин уонна бултааһын туһунан кэпсээтэ. Степан Поликарпович 2 кылаастарга бастакы көмө уонна противогаз ГП 5 хайдах кэтиллэрин үөрэттэ. Ариан Николаевич чэбдигирдэр, эмтиир физкультура туһатын кэпсээтэ, эрчиллиилэри көрдөрдө. Семен Семенович 5-6 кылаас үөрэнээччилэригэр Россия сокуоннарын, Конституция, муниципальнай сулууспа, нэһилиэк, улуус баһылыгын, нэһилиэк депутаттарын туһунан кэпсээтэ. Александр Петрович 8-9 кылаас оҕолоругар көмүһү хайдах хостуулларын, хайдах сууйалларын, туох булкаастаах буолуон сөбүн, төһө туонна хостонорун, хамнаһа төһө буоларын, көмүс хостуурга ханнык идэлээх дьон үлэлииллэрин сырдатта.
Биһиги интэриэһиргээн истибиппит, ыйытыы биэрбиппит. Аҕаларбытын өссө төгүл эҕэрдэлиибит. Үлэлэригэр ситиһиини, кытаанах доруобуйаны баҕарабыт, күүскэ таптыыбыт.
Рая Фомина, М.Н. Сибиряков аатынан Сэргэ-Бэс оскуолатын 6 кылааһын үөрэнээччитэ.