Болугур олохтооҕо Николай Платонов саха төрүт музыкальнай үнүстүрүмүөннэрин тарҕатар үлэни ыыппыта үс сыл буолла. Бу дьарыгын сайыннарарыгар, дьиэ кэргэнигэр дохуот киллэрэригэр социальнай хантыраак нөҥүө ылбыт судаарыстыбаттан көмөтө улахан тирэх буолла.
Болугур нэһилиэгэ саха төрүт дьарыктарын, өбүгэ үгэстэрин тарҕатыыга Амма улууһугар биир инники күөҥҥэ сылдьар. Болугурдар тылынан уус-уран көрүҥнэри сайыннарары сэргэ сахалыы оҥоһуктары, иһити-хомуоһу, таҥаһы-сабы тилиннэриигэ үлэлииллэр. Дэлэҕэ даҕаны мантан туойунан, маһынан дьарыкка, иискэ биллэр норуот маастардара тахсыахтара дуо?
Болугурга биир тарбаҕар талааннаах, ону ааһан сэдэх үлэнэн — кыл кырыымпаны оҥоруунан, тарҕатыынан дьарыктанар киһинэн Николай Платонов буолар.
Николай Аркадьевич кыл кырыымпаны оҥоруунан үлүһүйбүтэ балачча буолла эрээри, ааспыт сайынтан эрэ ыкса ылсан, атыыга анаан үлэлээн эрэр. Онуоха кини биисинэс-былаан суруйан, көмүскээн социальнай хантыраагынан көмө харчы ылбыта бэйэ дьарыктаах буолан биисинэс эйгэтигэр маҥнайгы хардыылары оҥороругар улахан көҕүлүүр күүс буолла.
-Социальнай хантыраак көмөтүнэн бэйэ дьыалатын арыммыт дьон холобурдарын хаһыакка, тэлэбиидэнньэҕэ, социальнай ситимнэргэ элбэхтик ааҕар, истэр этим. Онтон үлэлиир саастаах доруобуйаларынан хааччахтаах дьоҥҥо бырагыраама киирбитигэр бэйэбин холонон көрөргө быһаарыммытым. Бэс ыйыгар кыл кырыымпаны оҥорууга былааммын көмүскээн, харчы түспүтүгэр уһанарбар тиийбэт үнүстүрүмүөннэрбин ылынан сакааска үлэлии сылдьабын. Сакаас син киирэр. Манна эбии олбуор, олбуор аана, дьиэ ис үлэтин оҥорууга, түннүк, аан туруорарга сакаастары ылабын. Табыгастаах туттар тэрил баара үлэбин биллэ чэпчэтэр, оҥоһуктарым ирдэбилгэ, дьон баҕатыгар эппиэттиир хаачыстыбалаах буолалларыгар улахан оруоллаах эбит диэн түмүккэ кэллим. Онон киллэрэр харчым, дохуотум дьиэ кэргэммит бигэ тирэхтээх буоларыгар баһаам көмөнү оҥорор,- диэн Николай Платонов санаатын үллэстэр.
„Амма олоҕо“ хаһыат.