Соморсун нэһилиэгэр саха тылын уонна суругун-бичигин күнүгэр Россияҕа Дьиэ кэргэн, Саха сиригэр Оҕо аймах, Амма улууһугар Олоҥхо сылын арыйар, биир ситиигэ тиһэр үөрүүлээх дьоро тэрээһинэ ыытылынна.
Дьоро киэһэҕэ Соморсун нэһилиэгин баһылыга Кононов Алексей Юрьевич нэһилиэк дьонун ис сүрэҕиттэн эҕэрдэлээн туран, бу сылга туһаайыллыбыт дьаһалын дьон-сэргэ ортотугар билиһиннэрдэ. Ол курдук, Дьиэ кэргэн сылын Николай Андросов дириэктэрдээх А.П. Рязанскай аатынан орто оскуола, Саха сиригэр Оҕо аймах сылын Саргылана Данилова сэбиэдиссэйдээх «Чэчир» оҕо сайдар киин, Олоҥхо сылын Надежда Игнатьева дириэктэрдээх «Дархан» култуура киинин коллективтара тэрийээччилэринэн (координатордарынан) ананнылар уонна сыл бэлиэтин үөрүүлээх быһыыга-майгыга тутан харда эҕэрдэ тылларын көрөөччүлэргэ тиэртилэр.
Маны таһынан, анал дьаһалынан 2024 сылга нэһилиэккэ дьиэ кэргэн сыанабылын үрдэтэр, кэнчээри ыччат кэскилин түстүүр сыаллаах баһылык анал бириэмийэлэрэ олохтоннулар. Ол курдук, «Бастыҥ дьиэ кэргэн», «Сыл оҕото», «Эдэр ыал», кыһыл уонна үрүҥ көмүс сыбаайбалаах дьиэ кэргэттэр сыл устата бириэмийэлэри тутуохтара. Баһылык солбуйааччыта Надежда Белолюбская Саха өрөспүүбүлүкэтигэр Оҕо аймах сылынан нэһилиэк общественноһын, бары тэритэлэрин «Түөлбэ эркээйитэ» бырайыакка оҕону иитиигэ- сайыннарыыга сыл устата бары кыттыһалларыгар ыҥырда, бырайыак барылын туттарда.
Биэчэргэ кыра оҕотуттан саҕалаан, кырдьаҕаһыгар тиийэ кытыннылар. «Чэчир» уһуйаан, орто оскуола үөрэнээччилэрэ, култуура киинин түмсүүлэрэ кыттыылаах эҕэрдэ кэнсиэргэ ийэ тыл кэрэтин, дьоллоох оҕо саас, олоҥхо алыптаах эйгэтин тула ырыа-тойук, үҥкүү-битии оройуттан тутулунна.
Педагогическай үлэ бэтэрээнэ Ирина Федорова туруоруутунан 10 дьиэ кэргэн, барыта 30 киһи үс көлүөнэнэн Бүөтүр Тобуруокап «Айхал, Сахам тылыгар!» ( АЛГЫС ПОЭМА ) поэматын дорҕоонноохтук аахпыттара дьон-сэргэ сэҥээриитин ылла. Манна 5 саастаах саамай эдэр кыттааччытан саҕалаан, ытык саастаах кырдьаҕастарга тиийэ ийэ тыл кэрэтин, күндүтүн дьоҥҥо-сэргэҕэ тиэртилэр.
Түмүккэ дьоро күҥҥэ кыттыбыт, эҕэрдэлэрин тиэрпит дьон, бары үтүөнү-кэрэни баҕаран ситиигэ салама баайан, бары биир ситим таһаарыылаах үлэни, дьоллоох олоҕу түстээн сылбытын арыйдыбыт.
Надежда Белолюбская.