А.П. Рязанскай аатынан Соморсун орто оскуолатыгар Россияҕа Дьиэ кэргэн, Саха Өрөспүүбүлүкэтигэр Оҕо саас сылын көрсө үөрэнээччилэри бүүс бүтүннү хабан «12 ый» музыкальнай испэктээк туран олохтоохтор дьүүллэригэр таҕыста.
Үөрэнээччилэр хас эмэ ый эрдэттэн бэлэмнэнэн, оруолларын үөрэтэн бу күн сыанаҕа долгуйа оонньоотулар. Сүрүн оруолу 5 кылаас үөрэнээччитэ Туллуктаана Тимофеева олус итэҕэтиилээхтик оонньоото. Атаах кыыс — Даайа Давыдова, маачаха — Айыына Мартынова, принцесса — Ангелина Кононова, учуутал — Дамир Протопопов оруолларын олус учугэйдик көрөөччүгэ тиэрдэн дьон сэҥээриитин ыллылар. Алын сүһүөх кылаас үөрэнээччилэрэ тииҥнэр, куобахтар, тыаллар буолан ыллаан, үҥкүүлээн тэйдилэр. Орто сүһүөхтэр сибэккилэр, ньургуһуннар, мажореткалар, бөрөлөр оруолларын толордулар. Улахан кылаас уолаттара 12 ый оруолун дьоһуннаахтык көрдөрдүлэр. Дьиэҕэ олорон үөрэнэр доруобуйатынан хааччахтаах 5 кылаас үөрэнээччитэ Роббек Күннэй сибэккилэр үҥкүүлэригэр олорон эрэн үөрэн-көтөн, долгуйан туран кытынна.
Бырайыак ааптара оскуола социальнай педагога Галина Иванова, учууталлары, төрөппүттэри түмэн биир сыалынан, санаанан үлэлээннэр ситистилэр. Сценарийы дириэктэри иитэр үлэҕэ солбуйааччы Надежда Охлопкова, оҕо тэрилтэтин салайааччыта Софья Гоголева суруйдулар, ырыаларынан Марианна Тараховская, үҥкүүлэринэн Саргылана Саввинова ситэрдилэр. Уус-уран киэргэтиини учууталлар Александра Сокольникова, Сардана Борохина айан таһаардылар.Туттар тэриллэри Артур Макаров, Кирилл Корякин, Александр Неустроев оҥордулар. Туруоруу сүрүн сүбэһитэ — оскуола бибилэтиэкэрэ Анисия Готовцева.
Маннык тэрээһин оҕоҕо туһата олус элбэҕин өйдөөн төрөппүттэр сүрүн күүс-көмө буоллулар. Кулууп үлэһиттэрэ туттар тэрилинэн, уотунан-күөһүнэн, көстүүмүнэн өйөөтүлэр. Оскуола-төрөппүт-нэһилиэк биир санаанан салайтаран үлэлээтэхтэринэ үлэ үтүө түмүктээх буолара саарбаҕа суох.
Надежда Охлопкова.