Соморсун орто оскуолатын «Ручная магия» биисинэс-инкубаторын кыргыттара икки улахан тэрээһиҥҥэ кыттыһан аҕам саастаахтары, учууталлары эҕэрдэлээтилэр, минньигэс астарынан, бэйэ оҥоһуу чэйинэн күндүлээн нэһилиэктэрин олохтоохторун, оскуолаларын учууталларын үөртүлэр.
«Алтынньы 3 күнүгэр кырдаҕастар декадаларынан ситимнээн А.П. Рязанскай аатынан оскуолабыт биисинэс-инкубатор иитиллээччилэрэ нэһилиэкпит аҕам саастаахтарыгар мыыла оҥоруутугар маастар кылаас ыыттыбыт, бэйэбит оҥорбут минньигэс туорпутунан күндүлээтибит, бэйэбит мыылаларбытын бэлэхтээтибит. Алтынньы 4 күнүгэр Учуутал күнүнэн күндү бары учууталларбытын эмиэ бэйэбит оҥорбут туорпутунан, пиццабытынан уонна эмтээх отторунан бэлэмнээбит чэйбитинэн маанылаатыбыт. Түгэнинэн туһанан биһигини элбэххэ үөрэтэр, уһуйар, сатабылбытын сайыннарар таптыыр салайааччыбытын Анастасия Алексеевна Федорованы ис сүрэхпититтэн Учуутал күнүнэн эҕэрдэлиибит уонна туйгун доруобуйаны, дьолу баҕарабыт,»- диэн үөрүүтүн үллэстэр 9 кылаас үөрэнээччитэ Даайа Давыдова.
Алтана Артемьева, үөрэх салалтатын иитэр үлэҕэ уонна эбии үөрэхтээһиҥҥэ исписэлииһэ