Амма нэһилиэгин “Хатыҥчаана” уһуйааҥҥа Соморсуннааҕы “Чэчир” оҕо сайдар киинэ, уһуйаан төрүттэммитэ 65 сыллаах үбүлүөйдээх сылыгар анаммыт тэрээһиннэрин уонна улууспутугар Олоҥхо сылын чэрчитинэн «Чэчир ыллыгынан олоҥхоҕо айан» диэн педагогическай десаны үлэлэттэ.
Педдесаҥҥа улуус уһуйааннарын үлэһиттэрэ кыттыыны ыллылар. Десант үлэтин, сыалын- соругун кыттааччыларга билиһиннэрэр аан тылы Амма улууһун үөрэҕин салалтатын информационнай-методическай отделын сүрүннүүр исписэлииһэ Эмма Давыдова уонна Соморсуннааҕы “Чэчир” уһуйаан салайааччыта Саргылана Данилова эттилэр. Бу кэннэ чэчирдэр «Дорҕоон доллоһуйан үөскээбитэ» диэн композицияларынан, тоҕус добун алгыстаах хамсаныынан түһүлгэлэрин арыйдылар. Чэчир уһуйаан иитээччилэрэ чөмчүүк саастаах оҕолору иитэр- үөрэтэр үлэлэригэр, Олоҥхо педагогикатын дьүөрэлээн, араас хайысханы хабан сыллата кэҥэппит баай уопуттарын, туттар ньымаларын биир идэлээхтэригэр көрдөрөр, үллэстэр былаһааккаларын үс секциянан арааран үлэлэттилэр.
Ол курдук наставник- иитээччи Наталья Арылахова уонна эдэр иитээччилэр Прасковья Максимова, Сайыына Еримеева, «ИКТ технологиятын нөҥүө олоҥхо оонньуулара» , «Лего&олоҥхо- Ай-тут-оҥор» тиэмэлэринэн, кыра бөлөх иитээччилэрэ Марфа Белолюбская, Мария Емельянова, Прасковья Новикова «Кырачааннарга олоҥхону билиһиннэрии» диэн ситимнээх, бырайыак үлэлэрин, уһуйаан муусукаҕа салайааччыта Евдокия Владимирова «Олоҥхо ырыатын- тойугун чөмчүүк саастаах оҕолорго үөрэтии» үгүс сыллаах үлэтин ньыматыттан маастар кылааһын, уһуйаан психолога, «Дьиэрэҥкэй» үҥкүү куруһуогун салайааччыта Надежда Ноева «Оҕолорго олоҥхо үҥкүүтэ» үлэ уопутун, физкультурнай салайааччы Вера Федорова иитэр — методическай үлэҕэ сэбиэдиссэйи солбуйааччы Татьяна Попова «Олоҥхо хамсаныылаах оонньуулара» дьарыкка туттар оонньууларын, логопед Мария Лебедева » Олоҥхо-Алиас- Батл» варианнардаах оонньуутун, эдэр, элбэх оҕолоох ийэлэр Нюргуяна Окорокова уонна Мария Тимофеева » Уус- уран тарбах оҥоһуктара» маастар кылаастарын уонна оҥоһуктарын быыстапкатын, иитэр-методическай үлэҕэ сэбиэдиссэйи солбуйааччы Татьяна Попова «Мин, төрөппүтүм, иитээччим- биир ситим» диэн, төрөппүтү кытта үлэҕэ уһуйаан үс сыллаах бырайыагын биир идэлээхтэригэр үллэһиннилэр.
Бу тэрээһиҥҥэ улуус 12 уһуйааннарын үлэһиттэрэ кэлэн кыттыыны ыллылар, тэҥҥэ оонньоотулар, ньымалары билистилэр, тутан- хабан оҥордулар. «Сылдьар — сыыһы, көрдүүр — көһүйэ көмүһү булар» диэн өбүгэ өс хоһоонуттан сиэттэрэммит, педдесаммыт кыттыылаахтара бэйэлэригэр туһааннааҕы, туһалааҕы ыланнар, кыым саҕыллыбыта, харах уоттаммыта буолуо диэн эрэнэбит.
Саргылана ДАНИЛОВА