Соморсун үөрэнээччилэрэ Олоҥхо дэкээдэтин чэрчитинэн уонна Саха Өрөспүүбүлүкэтигэр Оҕо саас сылынан киэн туттар суруйааччыбыт В.М. Новиков — Күннүк Уурастыырап «Нуоҕалдьын Кугас аттаах Тойон Дьаҕарыма бухатыыр» олоҥхону туруоран көрөөччү киэҥ араҥатыгар таһаардылар.
Сүрүн оруоллары Эрчим Иванов, Милена Дорофеева, Айтал Емельянов толордулар. Алын сүһүөх кылаас үөрэнээччилэрэ от-мас иччилэрин — Эрэкэ Дьэрэкэ оҕолору, аллараа дойду абааһыларын оруолларын олус кыһаллан оонньоотулар, үҥкүүлээн көрдөрдүлэр. Маны таһынан атын оруоллары оскуола үөрэнээччилэрэ итэҕэтиилээхтик оонньоон, көрөөччүлэр болҕомтолорун тартылар.
Сахалыы музыкальнай үнүстүрүмүөҥҥэ — кырыымпаҕа дьарыктанар оҕолор олоҥхо көстөрүн тухары тыыннаах доҕуһуолунан арыаллаабыттара көрөөччүнү ордук интэриэһиргэттэ.
Үөрэнээччилэр эппиэтинэстээхтик сыһыаннаһан, олус кыһаллан, тылларын барытын лоп курдук үөрэтэн артыыстаабыттара хайҕаллаах. Олоҥхону «Дархан» култуура киинин уус-уран салайааччыта, оскуола театрын иилээн-саҕалаан үлэлэтэр Туйаара Белолюбская туруорда, үҥкүүлэри оскуола «Кустук» оҕо тэрилтэтин салайааччыта Саргылана Саввинова үөрэттэ. Инникитин өссө да араас туруоруулары көрдөрөн көрөөччү дьүүлүгэр таһаарыахпыт, дьон биһирэбилин ылыахпыт диэн эрэнэбит.
Надежда Охлопкова, дириэктэри иитэр үлэҕэ солбуйааччы,
оҕолор общественнай хамсааһыннарын ситимнээн иитэр үлэҕэ директор сүбэһитэ.