Соморсун нэһилиэгэр Арассыыйаҕа Дьиэ кэргэн, Саха сиригэр Оҕо саас сылынан “Амма кэскилэ” оҕо уопсастыбаннай тэрилтэтэ “Amgarun” диэн экологическай хайысхалаах сүүрүүнү ыытта. Тэрилтэ бу тэрээһинин Ил Дархан Граныгар кыттан кыайбыт бырайыагын чэрчитинэн тэрийдэ.
Манна бырайыак балаһыанньатынан Соморсунтан 20-н тахса уонна Мээндигиттэн 1 дьиэ кэргэн, 2024 миэтэрэ дистанцияҕа сүүрэргэ хоннохторун холостулар, былчыҥнарын быһаарыстылар, тилэхтэрин тэлэстилэр, эрбии биитин курдук биэтэккэ диэри кииристилэр. Кинилэри өйөөн, Амма айылҕатын харыстыырга туруулуһар дьоҕурдарын көрдөрөн, акцияҕа кыттыһан, Соморсун орто оскуолатын үөрэнээччилэрэ эмиэ биэтэккэ илин-кэлин түһүстүлэр, үөрүү-көтүү үктэллэннилэр. Түмүккэ саамай түргэн бириэмэни көрдөрөн Ольга Иннокентьевна, Александр Александрович Неустроевтар оҕолорунаан Сашалыын уонна Артурдуун биэтэккэ сиэттиспитинэн бастакынан кэллилэр.
Иккискэ Александра Николаевна Сокольникова уолунаан Сайаанныын уонна үһүскэ Матрена Романовна Баянакова уолунаан Эрчимнниин таҕыстылар. Күрэх саамай аҕам саастаах кыттааччытынан 69 саастаах Антонина Степанова, саамай кыра кыттааччытынан 2 саастаах Кристина Макарова буоллулар.
Бу күн ыытыллыбыт пластиковай хаппахтары хомуйуу күрэҕэр Аман, Толлуман Тимофеевтар бастакы, Арсений, Милена Дорофеевтар иккис, Саина, Александр Капитоновтар уолларынаан Сашалыын үһүс миэстэлэри ылан, өйдөбүнньүк бэлэхтэри туттулар.
Амма улууһугар үһүс төгүлүн ыытыллар, “AMGARUN” экологическай сүүрүү Соморсун нэһилиэгин дьиэ кэргэттэригэр, оҕо аймаҕар үгүс үөрүүлээх дьоро түгэни бэлэхтээтэ, үрдүк биһирэбили ылла. Бырайыак ааптардарыгар Зоя Пахомоваҕа уонна “Амма кэскилэ” оҕо уопсастыбаннай хамсааһынын бары хамаандатыгар истиҥ махталбытын тиэрдэбит, салгыы элбэх ситиһии көтөллөнөн, кэрэхсэнэр бырайыактара олоххо киирэ турдуннар.
Надежда БЕЛОЛЮБСКАЯ