Арассыыйаҕа Дьиэ кэргэн, Саха сиригэр Оҕо саас сылларыгар Соморсун орто оскуолатын үөрэнээччилэрэ «Көмүс күһүн бэлэхтэрэ» атыы-эргиэн дьаарбаҥкатын нэһилиэнньэ киэҥ араҥатыгар тэрийдилэр.
Бу күн оҕуруот аһа, кыһыҥҥы хаһаас кэнсиэрбэ, бурдук ас арааһа, онтон да атын минньигэс, тотоойу ас дьаарбаҥка остуолларын толору тардылынна. Маны таһынан «Бастыҥ атыыга ыҥырааччылар», «Ураты көрүҥнээх оҕуруот астара», «Саамай улахан хортуоппуй», «Бастыҥ киэргэтиилээх атыы-эргиэн сандалыта», «Саамай бастыҥ атыыһыттар», «Кэрэ көстүүлээх айылҕа матырыйаалыттан оҥоһук» — күөн күрэстэр ыытылыннылар.
Оскуола үөрэнээччилэрэ эҕэрдэ ырыаларын бэлэх уунан дьаарбаҥка кыттыылаахтарын сэргэхситтилэр, ураты оҥоһуулаах фотозонаҕа өйдөбүнньүк хаартыскаҕа түстүлэр.
Дьаарбаҥка кыттыылаахтара, нэһилиэк олохтоохторо бука бары сэргэхсийэн, үөрэн-көтөн, илии тутуурдаах тарҕастылар.
- Надежда ОХЛОПКОВА,
А.П. Рязанскай аатынан Соморсун орто оскуолатын дириэктэри иитэр үлэҕэ солбуйааччыта, сүбэһит.