Соморсуҥҥа «Сайылык оонньуулара» көрдөөх биэтэктэр сонун күрэх ыытылынна

Ленин аатынан миллионер холкуос 100 сыллаах үбүлүөйдээх ыһыаҕар биир умнуллубат көрдөөх кү­рэ­ҕинэн «Сайылык оонньуу­лара» буолла. Манна Сулҕаччы, Бө­түҥ, Абаҕа уонна Со­морсун нэ­һилиэктэриттэн тыа ха­һаайыстыбатын үлэһиттэрэ хамаанда ту­руораннар көхтөөхтүк кы­тыннылар. Биэс түһүмэхтээх эстафетаҕа үлэҕэ сатабылларын, түргэн-тарҕан туттууларын, асчыттарын тургутан көрдөрдүлэр.


Старт бэриллээтин кытта бас­такы күрэхтэһээччилэр бэрт түргэнник уһааттан биэдэрэҕэ уу баһаат, сүүрбэччэ миэтэрэ тэйиччи турар бөтүөҥҥэ дьалкыппакка сүү­рэн тиийэн уу ку­­тан силлиргэттилэр. Ол кэн­­нэ эмиэ бэрт түргэнник төт­төрү сүүрэн кэлээт уһааттан уу баһа охсоот, иккис биэ­дэрэлэрин то­лороот эмиэ бөтүөннэригэр сүүрдүлэр. Онуоха кини­лэри күүтэн ох курдук оҥостон тур­бут иккис кыттаач­чылар тэ­лиэскэлэрин соспутунан 20 лии­­тирэлээх уулаах бөтүөн­нэ­рин соһон тигинэтэн аҕа­лаат­тарын кытта үһүс кыттаач­чы сэппэрээтэр хо­муйар түбүгэр түстэ. Төрдүс түһүмэх­хэ от мунньааччылар кыраабыллара биир кэм күөрэҥнээн олордо, отторун субуулаан, лэкээ­лээн бэрт түргэнник бүтэрэн кэбис­тилэр. Дьэ, ол кэннэ бэһис кыт­тааччы күөрчэх ытыйан үл­лэҥнэттэ, итиэннэ дьүүллүүр сүбэ сандалытыгар күөрчэхтээх мааны бүлүүдэтин ууратын кытта күрэх түмүктэммитинэн ааҕылынна. Ити курдук биэс хамаанда бэриллибит түһүмэх­тэри ситиһиилээхтик ааһан­нар кыайыыга дьулуурдарын көрдөрдүлэр. Хамаандалар би­риэмэҕэ күрэхтэһэр буоланнар ыксалга араас көрүдьүөс хамсаныылар да таҕыстылар, умнуллубат түгэннэр да баар буол­лулар.

Түмүккэ «Бөтүҥ» хаһаайыстыба ха­маандата кыайыылаах тах­сан, Алексей Караканов салайааччылаах «Сэргэ» бааһынай хаһаайыстыба уба­һатынан, итиэннэ Ленин ааты­нан холкуос ыанньык­сыта, Герой Ийэ Мария Окорокова аатынан оҕолоро туруорбут тэлэбиисэр бириистэринэн на­ҕараадаланнылар. Иккис миэс­тэ Абаҕаттан «Илгэ» хаһаайыстыба хамаандата буолан, Ленин ааты­нан холкуос кылаабынай буҕаалтыра Дмитрий Старос­тин аатынан оҕолоро, сиэннэрэ туруорбут 50 000 солкуобай уу харчынан бирииһи туттуллар. Үһүс миэстэ Прокопий Нестеров уонна Маҥан Маайа сиэннэрин хамаандата таҕыста. Кутуковтар аймахтар аҕалара, Ленин аатынан хол­куос ыанньыксыта, биэс уордьан кавалера Михаил Кутуков аатынан 25 000 солкуобайдаах би­риистэрин туттуллар.

Маны таһынан бары кыттааччыларга анал ааттар иҥэ­рилиннилэр. “Дьүккүөрдээх кыттааччылар” – «Соморсун» хаһаайыстыба хамаандата, кинилэр Ленин аатынан холкуос ыанньыксыта, үлэ бэтэрээнэ Мария Анисимова аатынан 6000 сол­куобай харчынан, итиэннэ Ленин аатынан холкуос ыан­ньык­сыта Вера Пет­ровна уонна сэрии бэтэрээнэ Николай Саввиннар ааттарынан оҥочо бириистэрин туттуллар. Соморсунтан Майя Давыдова “Эдэр отчут” анал аат хаһаайката буо­лан, «Марал» фирма бэлэҕин, итиэннэ Ленин аатынан холкуос ыанньыксыта, үлэ бэтэрээнэ Мария Софронова аатынан бирииһи тутта. “Сандалы остуол” анал аакка Вера Саввина сиэннэрэ соморсуннар буоланнар «Көмүлүөк» фирматтан иһит наборунан, итиэн­нэ Ленин аатынан холкуос ыанньыксыта, үлэ бэтэрээнэ, Сулҕаччы нэһилиэгин бо­чуоттаах олохтооҕо Елена Кочаткина аатынан бирииһи­нэн наҕараадаланнылар. «Түргэн туттуулаах» кыттааччынан Сулҕаччы нэһилиэгиттэн Сулгачаана Крюкова буолан Пелагея Нестерева баһылыктаах хаһаайыстыба 5000 солкуобай уу харчынан бирииһин тутта. “Бас­тыҥ лэкээни” Абаҕаттан «Ил­гэ» тэрилтэ хамаандата оҥо­рон гриль бирииһинэн, итиэн­нэ Ленин холкуос ыан­ньыксы­та Мария Нико­лае­ва, хол­куос тутаах үлэһитэ, са­ла­йаач­чы Петр Иванов аат­та­ры­нан би­рииһи туттуллар. Сулҕаччы нэһилиэгин бааһы­най хаһаайыстыбаларын үлэ­һит­тэрин хамаандата “Кыйыыга дьулуурдарын” көрдөрөннөр «Соморсун» хаһаайыстыба кэллэктиибэ туруорбут ньирэй бириистэринэн наҕараадаланнылар.
Манна даҕатан эттэххэ, Ленин аатынан холкуос бастыҥ үлэһиттэрин ааттарынан бириистэри кинилэр оҕолоро, аймахтара, сиэннэрэ олохтооннор үбүлүөйдээх ыһыахха тус кы­лааттарын киллэрдилэр.

Вера ИВАНОВА

Читайте дальше