Соморсуннааҕы «Чэчир» оҕону сайыннарар киин 65 сыллаах үбүлүөйдээх дьоро күнэ үрдүк таһымҥа ааста. Бу күн сайдыы историятын кэрэһэлиир кинигэ-альбом сүрэхтэннэ, күндү бэлэх буолла.
Соморсун нэһилиэгин кырачааннарын кэрэҕэ, сырдыкка уһуйар дьиэ үбүлүөйүн бэлиэтии ыраахтан-чугастан ыҥырыылаах ыалдьыттар, араас сылларга үлэлээн ааспыт бэтэрээннэр, нэһилиэк тэрилтэтин салайааччылара, төрөппүттэр үөрэ-көтө кэлбиттэр. Уһуйаан кэлэктиибэ бэтэрээннэрин илиилэриттэн сиэтэн киллэрбиттэрин ытыс тыаһынан уруйдаан көрүстүбүт. Салайааччы Саргылаана Данилова уһуйаан 65 сыллаах үлэтин, хайдах тэриллэн, үлэлээн-хамсаан, сайдан кэлбитин хомоҕой тылынан билиһиннэрдэ.
Бэлиэ күннэринэн соморсуннары улуус баһылыгын социальнай боппуруостарга солбуйааччы Нюргуяна Илларионова, улуус дьокутаата, Соморсун нэһилиэгин куратора, улуус тыатын хаһаайыстыбатын управлениетын салайааччыта Ион Кононов,үөрэх салалтатын начальнига Николай Ларионов, үөрэх үлэһиттэрин идэлээх сойуустарын кэмитиэтин аатыттан Мария Кузнецова, Соморсун нэһилиэгин баһылыга Алексей Кононов эҕэрдэлээтилэр, үлэ дьонун чиэстээн наҕараада туттардылар. Дьоро күн «Чэчир» уһуйаан 65 сылынан альбом- кинигэни сүрэхтээтилэр, үйэлээх үлэни ытыктабыллаах бэтэрээннэригэр үтүө бэлэх гынан туттаран үөртүлэр. Үбүлүөй уһуйаан оҕолорун, кэлэктиибин бэртээхэй кэнсиэринэн, минньигэс астаах сандалы остуол тула истиҥ сэһэргэһиинэн, уруккуну-хойуккуну ахтыынан түмүктэннэ.
Эмма ДАВЫДОВА