Ил Түмэҥҥэ Амма улууһун дьиэ-уот коммунальнай хаһаайыстыбатын инфраструктуратын сайдыытыгар туһуламмыт сүбэ мунньах буолан ааста. Мунньаҕы Амма -Уус Маайа уокуругуттан норуот дьокутаата, Ил Түмэн тутууга, дьиэ-уот коммунальнай хаһаайыстыбатыгар уонна энергетикаҕа сис кэмитиэтин бэрэссэдээтэлэ Александр Корякин салайан ыытта.
Олохпут сүрүн хайысхаларын боппуруостарын дьүүллэһиигэ Амма улууһун баһылыга Степан Кузьмин уонна кинини тутууга уонна инфраструктураҕа солбуйааччыта Виктор Смирников кыттыыны ыллылар.
“Бу биһиги улууспут энергетикатын уонна коммунальнай хаһаайыстыба эйгэтигэр туһуламмыт сайдыы боппуруостарыгар олус суолталаах мунньах. Тоҕо диэтэр улууспутугар күүстээх уоппут тутуута, канализационнай-ыраастыыр станция, ыраас уунан хааччыйар станция иккис уочарата, чааһынай ыаллар салгыы киин ититэр ситимҥэ холбонуулара, саҥа хочуолунайдар тутуулара инникитин күүскэ турар. Кинилэри быһаарыыга уустуктар бааллар. Бу боппуруостары сэргэ кытаанах бөхтөрү харайыы кыһалҕатын эмиэ дьүүллэстибит. Мунньахха эппиэттээх салайааччылар кыттан бэйэбит боппуруостарбытын биэрэн, бэрт дьоһун кэпсэтиилэр буоллулар. Онон норуоппут дьокутаатыгар Александр Иванович Корякиҥҥа, бары кэлбит салайааччыларга махтанабыт”, — диэн баһылык Степан Николаевич санаатын үллэһиннэ.
Норуот дьокутаата Александр Корякин бэлиэтээбитинэн, улуус коммунальнай эйгэтин боппуруостарын быһаарыыга бу бүтэһик мунньах буолбатах. Инники өссө манна киирбит этиилэри кытта үлэлэһэн, күһүн эмиэ көрсүһүү, дьүүллэһии буолуо.
“Бу боппуруоһу мин тус хонтуруолбар тутабын. Улуус туох кыһалҕалааҕын билэбин. Онон салгыы үлэлэһэбит. Сүбэ мунньахха энергетиктар туох үлэни ыыта сылдьалларын, кытаанах бөҕү харайыыга үлэлэһэр региональнай оператор отчуоттаатылар. Канализационнай-ыраастыыр станция боппуруоһа сытыытык туран дьүүллэһилиннэ. Хочуолунайдар, коммунальнай хаһаайыстыба үлэтин туһунан иһиттибит. Үлэ салҕанар”, — диэн Александр Иванович сырдатта.
Сүбэ мунньахха бары туһааннаах салайааччылар кыттыыны ыллылар. Ол курдук СӨ дьиэ-уот коммунальнай хаһаайыстыбатыгар уонна энергетикаҕа миниистирэ Вячеслав Емельянов, СӨ экономикаҕа миниистирин солбуйааччы Иван Елисеев, “СӨ ОДьКХ” ГУП генеральнай дириэктэрэ Виталий Чикачев, “Якутскэнерго” ПАО филиалын дириэктэрэ Петр Иванов, “Центр ЖКХ и повышения энергоэффективности” СӨ ГАУ дириэктэрин э.т. Ирина Гринивецкая кыттаннар бэйэлэрин санааларын, көрүүлэрин тириэртилэр.
“Амма олоҕо” хаһыат
Хаартыска: Ил Түмэн пресс сулууспата